World Cup nomawi chawi tum - Van Gaal

Netherlands coach thar Louis van Gaal chuan World Cup nomawi chawi chu a hmachhawp a nih thu a sawi. Manchester United manager hlui hian Frank de Boer-a hmunruak a luah a, Oranje coach hna ṭum tum a thawhna a ni.

Kum 70 mi Van Gaal chuan, "Keima tan Netherlands coach hna hi ka thlang lo a, Dutch football ṭhat nan ka rawn pen chhuak. Dutch Football Association aiawh ni ta ila, kei lo chu pan tur dang ka hre chuang lo. Ka thusawi duh dan chu mak pawh inti maithei, mahse hun kan neih tlem avangin tawnhriat nei ṭha a pawimawh a ni," tiin a indah sang hle.

Netherlands hi World Cup qualifying round-ah group G-ah Gibraltar, Latvia, Montenegro, Norway leh Turkey te nen group khatah an awm. Oranje hian an match hmasa bera Turkey an hneh loh avangin match thum khelhah point ruk hmuin pahnihnaah an awm mek.

Van Gaal chuan, "Kum 2000-a coach atana min ruat khan chawimawinaah ka ngai a, 2012-a min ruat nawn kha chawimawina a ni leh a, tun ṭuma mi hi chu mi piah chu a ni. Kan ram World Cup-a champion pui hi ka tum," tiin a sawi.

Netherlands hian September thlatir hian World Cup qualifying-ah Norway, Montenegro leh Turkey an hmachhawn ang.