Juventus-ah Locatelli a kal

Juventus chuan Sassuolo aṭangin Italy international Manuel Locatelli an lalut dawn, nimin tlai khan medical a nei - chanchinbu i chhiar meuh chuan Old Lady player a ni fel tawh ang.

Juve leh Sassuolo inrem dan chuan, midfielder Locatelli hian season hnih chhung atan Turin club hi loan hmangin a zawm ang, chumi hnuah euro makataduai 35 senga lei ngheh theih a ni dawn - a khelh ṭhat dan a zirin a man hi a la sang thei bawk ang.

Kum 23 mi Locatelli hian 2019 July thla khan AC Milan aṭangin Sassuolo hi a zawm, inelna hrang hrangah match 99 a khelh aṭangin goal sarih a khung a, a ṭhiante khung tur vawi 11 a siamsak bawk.

Sassuolo tana a khelh ṭhat avangin Italy tana khel tura kohna pawh a dawng. Euro 2020 ṭantirh lamah Azzurri tan player pawimawh a ni a, Marco Verratti dam ṭhat hnuah khelhna hmun a chang mumal ta lo.