Ṭawng tlem la thawk tam rawh - Ronaldo

Football nipui bazar lai a ni a, thu leng vak a tam hle. Cristiano Ronaldo chuan a chungchang an sawina hrang hrang chu belhchian dawn lo a nih thu a sawi a, a inkhelh ṭan tirh aṭangin 'Ṭawng tlem la, thawk ram rawh' tih chu a thupui a la nih reng thu a sawi.

Portugal captain hi Paris Saint-Germain leh Manchester City te nen sawi zawm a ni a, a club hlui Real Madrid lama kir leh tur angin thawm a awm bawk. Mahse, tunah chuan Juventus bak ngaihtuah a nei lo.

Ronaldo hian Real Madrid a chhuahsan dawna a tih angin, tun hma deuh khan Turin aṭangin a car manto hi a phurh chhuahtir tawh a, Juve chhuahsan tur anga thuthang leh thu leng vak a awm tam pawh hi a mak hran lo a ni.

Ngawi rawh u...
Player ropui bik a nih avangin Ronaldo chanchin hian sawi a hlawh a, a chet velna chu media-te chaw tui a tling zel. Thuk dik bakah rinthu leh dawt thlengin a hma hun chungchang hi an sawi sak ṭhin a ni.

Ronaldo chuan, "Ka chungchang thu hi chi hrang hranga tarlan a ni lo, a zia lo zawk khawp mai. Min hre chiangtute chuan ka hmabak a hna thawh tur ka ngaihtuah lohzia an hria ang, ka dinhmun leh awm dan tur chu a chiang.

"Football ka khelh tirh aṭang khan ṭawng tam aia chuan a tak thawh tam hi nun kawng hruaitu atan ka hman a ni. Club hrang hrang nen min sawizawm a, thu dik tak hriat chhuah tuma bei erawh tlemte chauh an ni," tiin a sawi.

Portuguese forward hian Juventus tan season lina a hmang ṭan dawn. Old Lady-in an lakluh chhan ang takin Champions League nomawi hlawh chhuah ngei an tum dawn a, season thar atan inbuatsaihna pawh a nei ṭha hle.

Mangṭha Madrid
Manchester United aṭanga Real Madrid pantu Ronaldo hian Spanish club lian tan hlawhtlinna tam tak a lo chang tawh. La Liga hian manager thar Carlo Ancelotti an neih avangin an player ropui hi an lak kir leh mai ringtu pawh an tam.

Kum 36 mi Ronaldo chuan, "Real Madrid nena kan thawnthu chu ziah a ni tawh. Thu a ziah a ni a, nomawi leh record hrang hrang hmanga chhinchiah a ni a, Bernabeu Stadium-a Museum-ah dah a ni tawh, kum kua zet ka hun hman tawhna kha ka hre reng.

"Real Madrid fans dik tak chuan ka thil tih leh sulhnute kha min la hriatsak ve reng ang, kei pawhin ka ruilruah ka vawng reng dawn a ni," tiin a sawi a, tun hnua Real tana a hnathawh a thlir kir chang pawhin a lungawi tih a hriat.

Ballon d'Or vawi nga dawng tawhtu Ronaldo hian Real Madrid tan La Liga nomawi pahnih, Champions League nomawi pali leh Copa del Rey pahnih a chawi bawk; team hlawhtlinna bakah mimal chawimawina hrang hrang a dawng hnem hle.

Juve lamah
Real Madrid atang hian Ronaldo-a'n hun rei tak chhung Champions League nomawi chawi loa awm Juventus a pan. Turin khawpuiah season thum hmang tawhin an duh leh beisei ang erawh an la hlawh chhuak lo.

Juve hian season hmasa khan Serie A title chu Inter Milan lakah an chan. Tun season-ah hian manager thar Massimiliano Allegri kaihhruaina hnuaiah UCL bakah legaue title lak let an tum dawn, forward Ronaldo hi an mamawhna a sang dawn.

Italian manager Allegri hian an tana Ronaldo pawimawhna leh, team a din tum danah hmun lailum a chan thu a sawi tawh. Chuvangin Ronaldo hian season tharah Juventus jersey a hak chhunzawm ngei hmel.

Ronaldo awmna Juve hian August 22, Pathianni zanah Serie A an match hmasa ber atan Udinese an lenchilh ang. Inter bakah Napoli, AC Milan, Atalanta leh AS Roma te chu elpui hautak an nih dawn vangin a bul ṭan ṭhat a pawimawh ang.