Hnehna nen Simona Halep a lo kir

Simona Halep chuan kumin May thla hnua a vawi khat nan hnehna a chang ve leh ta. WTA Cincinnati Masters khelh laiah Halep hian Magda Linette 6-4, 3-6, 6-1 a hnehin inelna bul a ṭan fuh hle.

Romanian nula hi a chawn a hliam a, hei vang hian hun rei tak a inkhel thei lo. Kar hmasa khan Montreal-ah lo kir leh mah se a match hmasa berah a chak lo, tunah erawh chak ni hmel a hmu ve leh ta.

Kum 29 mi Halep chuan, "Inkhel hautak tak a ni, ruah sur vangin chawlh kan neih zeuh kha ka chhawr. Kan hahchawl thei a, kan inkhelh chhunzawm leh hnuah khan ka vanneih phah," tiin a sawi.

Grand Slam vawi hnih champion tawh Halep hian tun hmain Cincinnati Masters-ah hian final vawi thum a lut tawh, mahse a la hlawhtling lo. Tun ṭumah hian champion tura rinkai ber a ni chiah lo, a match lehpek atan Jessica Pegula a hmachhawn leh ang.

Inkhel dangah American tleirawl Coco Gauff chuan Taiwanese player Hsieh Su-Wei chu 6-1, 6-2 in a lo hneh ve bawk, round of 32-ah chuan Naomi Osaka nen an inhmachhawn leh dawn a ni.

Japanese star Osaka hian rilru lam harsatna a nei a, French Open aṭanga a inhnuhdawh hnuah Wimbledon pawh a khel lo. Tokyo 2020-ah a lo kir a, tun ṭuma inelna a hmachhawn dawn hian media a hmachhawn ṭumin a ṭap chhuak leh hial.