Africa Cup of Nations : Inkhelh kual dan tur an ti chiang
Africa ram hrang hrangte football hmanga inelna sang leh ngaihhlut Africa Cup of Nations 2021 khelh dan tur tih chian a ni a, hripui leng vanga kum khat an sawn tlai hnuah tun hnai khan group hrang hranga ṭhen hran dan an pawt fel.
A tira ruahman dan chuan Africa Cup of Nations hi kumin January thla a khelh tur kha a ni. Mahse, hri leng vangin khawvel a buai a, hri hian Africa pawh a kalkan bik lo - nakkum January 9 aṭanga February 6 chhung hian Cameroon chuan a thleng dawn a ni.
Team 24
Inelnaah hian team 24 an inlan dawn, a thlengtu Cameroon chu tling chiangsa an ni - team dang 23 chu qualifying hmanga zawn an ni thung. Tournament pangngai tak khelh hmain paltlang tur a hautak tihna a ni.
Team 24 hi group hrang parukah ṭhenhran leh vek an ni a, group pakhata awmte hi vawi khat ṭheuh an inkhel kual hmasa ang. Chumi hnua a sang pahnihte chuan last 16 a lut chhunzawm nghal zel ang.
Group tin aṭanga pahnih an tlang hnuah hmunruak pali a la awm dawn. Group tina pathumna zinga point hmu sang pali chuan last 16 an lut ve leh thei dawn tihna a ni, last 16 aṭang chuan knock out a ni tawh dawn.
Algeria vs Ivory Coast
Thawhlehni zan khan Cameroon khawpui Yaounde-ah African Cop of Nations hi draw neih a ni. Inkhel tur pawhnaah hian Confederation of African Football (CAF) president Patrice Motsepe, Cameroon legend Roger Milla bakah Didier Drogba, El Hadji Diouf leh Samuel Eto'o te an inlan.
Champion lai Algeria chu group E-ah Ivory Coast nen dah dun an ni. Manchester City forward Riyad Mahrez awmna Algeria hi vawi hnih champion tawh an ni a, inelna hnuhnung berah khan final-ah Senegal an hneh.
Algeria leh Ivory Coast te bakah Sierra Leone leh Equatorial Guinea te an awm khawm. An group thlir mai chuan Nigeria leh Ivory Coast te hi chu an chesual viau a nih ngawt loh chuan last 16 an luh ngei a rinawm.
EPL player
Premier League-ah African player tam tak an awm. Tuna a lan dan chuan Liverpool leh Arsenal te chu African Cup of Nations laia player chân nasa tur niin an lang - club dang zingah pawh thla khat vel player chhawr thei lo tur an awm ve dawn.
Reds hmatawng Mohamed Salah awmna Egypt chu vawi thum champion tawh Nigeria, Sudan leh Guinea-Bissau te nen an awm khawm. Sadio Mane te ram Senegal pawhin group B-ah Zimbabwe, Guinea leh Malawi te an hmachhawn ang.
Arsenal striker Pierre-Emerick Aubameyang te ram Gabon leh Thomas Partey awmna Ghana chu group C-ah an awmdun. Anni ram pahnih bakah hian Morocco leh Comoros te an awm khawm, an inel tawk hlawm viah tura ngaih a ni.