Shakhtar leh Salzburg tan Champions League a hnai
European football-a club inelna sang ber Champions League khel tura team tling sa chu 26 an ni a, group stage-a hmun ruak paruk hnawhkhah tur a la awm.
Thawhlehni zan khan hmun ruak hnawhkhah tumin playoff khelh a ni a, European football inelnaa mikhual lo Shakhtar Donetsk leh Red Bull Salzburg ten hnehna an chang ve ve.
Ukrainian club Shakhtar hian French club ṭha AS Monaco chu 1-0 in an hneh a, Salzburg-in Brøndby IF chu 2-1 in an hneh bawk - second leg khelh tur a la awm avangin an la tling chiang lo thung.
Thawhlehni zana Champions League playoff inkhel dangah Moldovan club FC Sheriff Tiraspol chuan Dinamo Zagreb an barakhaih a, Croatian club ṭha hi 3-0 in an hneh!
Mikhual tlangnel
Shakhtar leh Monaco-in third qualifying round aṭangin Champions League an hmachhawn a, playoff an inpetkai - Thawhlehni zanah Monaco khelmualah Shakhtar an lenglut a, mikhual tlangnel zia chhuahin an chak.
Ukrainian club goal awmchhun hi Brazilian attacking midfielder Pedrinho-a'n minute 19-naa a khung a ni. Kum 23 mi Pedrinho hian June thla khan Corinthians aṭangin Shakhtar hi euro maktaduai 18-in a zawm a, a club tharah a tlangnel nghal hle.
Pedrinho hian goal khung turin defender pathum a bum zet a, a hman thiam loh zawk a ke dinglamin goalkeeper Radoslaw Majecki man phak lohin a pet goal!
Monaco tan chawlhlawk hmain captain Wissam Ben Yedder leh mid-fielder Aurelien Tchouameni ten chance duhawm nei mah se Anatolii Trubin an paltlang thei lo a, kum 20 mi keeper hian second half-ah Aleksandr Golovin, Ben Yedder leh substitute Myron Boadu te chance duhawm chu a dansak bawk.
Salzburg an vannei
Thawhlehni zan inkhel ngaihven hlawh dangah Salzburg leh Brøndby te 1-1 in an ṭin mai dawn niin a lang hman a, mahse, minute 90-naa Brenden Aaronson goal khung hmangin Salzburg hi hun tawpah 2-1 in an chak!
Salzburg khelmualah Danish champion Brøndby-in rin loh takin goal hmahruai an khung a, season hmasaa Danish Superliga Player of the Season Mikael Uhre chuan minute lina lekah goal hmahruai a khung.
Austrian champion an ngawi rei bik lo - tun season-a form tak mai Karim Adeyemi chuan minute 56-naah si phurh sutna goal a khung. Kum 19 mi German forward hian tun season inelna hrang hrangah match ruk khela goal ruk khungin assist vawi khat a nei der tawh.
Salzburg-in mikhual laka draw result-a lungawi an tum lo. Hun a tawp dawn tawh tihah Brenden Aaronson chuan a rawn khung ve leh a, USA attacking midfielder pawh hi kum 20 mi lek niin hmabak a nei êng hle.
Beisei loh result
Tam tak chuan FC Sheriff Tiraspol hming hi an hriat vawi khatna a ni ngei ang - Dinamo Zagreb erawh European club lar ni phak an ni a, hriat an hlawh. Mahse, Thawhlehni zana team pahnih intawn ṭumin hriat hlawh lo zawkin goal thum an khung a, Dinamo lamin a chhanletna an nei lo!
Croatian champion Zagreb leh Moldova champion Sheriff hian first qualifying round aṭang ve vein inelna hi an hmachhawn a, mahse, an player neih dan en erawh chuan team pahnih hi an thlau.
Mahse, football-ah eng pawh a thleng thei tih a nih angin Sheriff lamin goal thum an khung a, Dinamo lamin a chhanletna tur an nei lo. Mali international Adama Traoré chuan goal hnih a khung a, Greece attacking midfielder Dimitris Kolovos chuan goal khat a khung ve bawk.
Dinamo Zagreb-in goal khung loa si thum phur chungin Moldova an mangṭha a, second leg-ah 'comeback' ropui an lantir thei lo a nih chuan Sheriff Tiraspol hi Moldovan club zinga Champions League group stage khel tura kai hmasa ber an ni ang.