Five star hmu tlak Red Star

Thawhlehni zan khan Europa League playoff inkhel pakhat a awm a, Serbian club ṭha Red Star Belgrade chuan harsatna nei loin an mikhual CFR Cluj chu 4-0 in an sawp.

Red Star tan El Fardou Ben Nabouhane chu player langsar a ni a, kum 32 mi Comoros international hian goal khat a khung bakah a ṭhiante khung tur vawi hnih a siamsak.

Serbian club tan hian Milan Pavkov, Aleksandar Katai leh Mirko Ivanic ten goal khat ṭheuh an khung bawk a, Romanian club CFR Cluj lamin a chhanletna tur an nei lo.

Red Star khelmuala inkhel team pahnih hian August 26 zanah second leg an khel leh dawn a, Romanian club ṭha Cluj-in goal li ngawt an chhuahsa avangin inlehthal tur chuan thil mak a thlen a ngai tawh ang.

Europa League playoff first leg-ah nizan khan Celtic leh AZ Alkmaar an inkhel a, he thu buatsaih a nih lai hian result kan hre hman lo.

Zanin dar 12:30-ah Champions League playoff inpetkai zo ta lo Rangers an inlan dawn a, Steven Gerrard-a enkawl team hian Armenian club FC Alashkert an hmachhawn ang.