Ka dam chhuak hi thil mak a ni - Jimenez

Wolverhampton Wanderers striker Raul Jimenez chu a lu ruh khi chungchanga a ṭawng chhuak a, Mexican striker chuan a dam chhuak chu doctor-ten thil mak ang hiala an ngaih thu a sawi.

Kum 30 mi striker chuan, "Doctor-te chuan ka hliam tawrh thlirin ka dam chhuak thei hrim hrim chu thil mak a nih thu min hrilh. Ka ruh a khi a, ka thluakah thisen tlem a lut bawk.

"Kha vang khan doctor-te pawhin rang taka min zai a ngai a, an hna an thawk ṭha hle a ni," a ti a, amah enkawltute chungah lawmthu a sawi.

Mahse, Mexican striker hian khelmuala a rawn kir leh hnuah a lu hliam tur ven nan inkhelh apiangin invenna lukhum (headguard) a khum a ngai tawh thung.

Jimenez chuan, "Doctor-te chuan buaina lian zawk ka tawh loh nana inven nana khum turin min ti a, ka tana inven a ngaihzia min hrilh. An thurawn ka zawm a ngai a ni," a ti.

Wolves hian August 14 zan khan tun season Premier League-a an match hmasa ber an khel a, Jimenez hian minute 90 chhung a khel - nikum Arsenal nen an inkhelh ṭuma a luh ruha hliam a tawrh hnua competitive match a khelh leh hmasak ber a ni.

Premier League striker 'hot' pawl Jimenez chuan, "Ka dam hunah nuam ka tih ber football khel tura ka lo kir leh hi ka ring tlat ṭhin. Ka career chu tawp mai tur angin ka ngaihtuah chhin ngai lo - chance chu a awm ngei a, mahse, khelmuala ka kir leh hi ka ring tlat ṭhin a ni," a ti.

Jimenez hi November khan Arsenal nen an inkhelh ṭumin Gunners defender David Luiz nen ball chan an tumna lamah an intauh fuh phal a, Jimenez hi damdawi in lamah hruai nghal a ni.

Wolves tan inelna hrang hrang match 67 a khelh aṭanga goal 31 khung thei striker hian thil thleng kha a hriatchian tawh loh thu a sawi a, a harh leh meuh chuan damdawi in lamah a lo awm tawh!

Jimenez chuan hrehawm a tih ber chu dam tawha inhriat hnua inkhelh theih loh chu a nih thu a sawi zui. Mexican striker chuan, "Keimah chuan dam tawhin ka inhria a,ka inpeih tawh.

"Mahse, MRI hmanga en a nih hnuah ka lo la dam chiang lo tih a lang leh si. Dam tawha inhre chunga inkhelh theih loh kha a hrehawm takzet a ni," tiin a sawi.

Mahse, Jimenez chuan paukhauh taka a hmaa thil inchhawp chu a hmachhawn thu a sawi a, awlsam taka tlawm mai a tum lo. Mexican striker chuan, "Ṭha tawh inti hle mah ila, inkhel tur khan ka la inpeih tlat lo.

"Mahse, kha hun hrehawmah khan ka theihtawp chu chhuah vein ka inhria a, hrehawm ti taka awm ka tum lo. Ka season a tawp tih ka hriat pawhin ka inti paukhauh lui a, thla thum tawp chu ka nghak leh a ni.

"Dam emaw ka intih hnua ka inkhelh theih lawk loh tur thu hriat kha chu a hrehawm takzet. Mahse, minute 10 hnuah chuan ka insangmar a, season thar atan ka inbuatsaih nghal char char ringawt mai a ni," a ti.

Wolves hian August 22 zanah tun season-a an league match hnihna an khel dawn a, season hmasaa an coach Nuno Espirito Santo enkawlna hnuaia khel Tottenham Hotspur nen an intawng ang.

Jimenez chuan, "A nuam dawn a ni. Nuno khan ka hun tawn hrehawmah khan min pui nasa a, kar thum liam ta mai pawh khan kan inhmu - ka inkhelh leh theih avanga a hlim thu min hrilh a ni," a ti - Pathianni zanah a hlim tak tak leh tak tak loh a hriat dawn e.