Premier League kir tum Fulham

Fulham-in Championship-ah rei tak hun hman an tum lo tih pholangin hnehna an chang leh ta a, Thawhlehni zan khan an mikhualna ramah Millwall chu 2-1 in an hneh.

Fulham tan hian Aleksandar Mitrovic chuan minute thumna lekah goal hmahruai a khung a, Fabio Carvalho chuan minute riatnaah a chhunzawm ve leh bawk - Millwall tan Benik Afobe chuan hun tawp nan minute thum chauh a awm tawh tihah khung ve leh mah se awmzia a nei phak lo a, 2-1 in an tlawm.

Fabio Carvalho chu Fulham tana player langsar a ni a, goal a khung bakah Mitrovic-a goal hmahruai khung chu a siamsak a ni. Kum 18 mi midfielder hian tun season-a league match thum an khelh tawha goal hnih a khungna a ni a, a kum a la naupan bawk avangin hmabak a nei êng hle.

Benfica youth system aṭanga bul ṭantu Carvalho hian age level-ah chuan England tan a khel a, Three Lions tan hian Under 16, U17 leh U18-ah te a khel - senior team tan erawh a la inlan loh avangin a pianna hmun Portugal tana inlan turin chance a la nei.

Championship inkhel ngaihven hlawh dangah Stoke City chuan khualmualah 3-1 in Swansea City an hneh a, Fulham nen match thum an khelh aṭanga point sarih ve ve neiin table chung lamah an awm mek.

Stoke City tan Nick Powell, Sam Clucas leh Leo Ostigard ten minute 60 chhungin goal thum an khung hman a, Swansea tan Joel Piroe chuan minute 73-naah si phurh rawn sut ṭhen mah se a team beng harh turin hunin a daih tawh lo.