Williams-i'n a khelh dan a thlak a ngai - coach

Tun hnaia Grand Slam khelh hoah Serena Williams-i'n beisei a phak lo a, a coach Patrick Mouratoglou chuan hlawhtlinna lian chang leh turin khelh dan phung thlak danglam leh tih takzet a pawimawh thu a sawi.

American star hian Grand Slam nomawi 23 a chawi tawh, record nei ṭha ber Margaret Court (24 titles) nih rual turin vawi khat champion bak a mamawh tawh lo; chungnung ber ni turin hun ṭha a nei.

Mahse, Serena hian fa a neih hnua tennis a khelh leh chinah hlawhtlinna lian a chang leh thei rih lo. Wimbledon leh US Open final lut mah se a chak lo zawkah a ṭang ve ve a, kar hmasa a khelh zawh tak Australian Open-ah phei chuan third round a paltlang zo lo.

Mouratoglou chuan, "Kan khelh dan phung a ṭha tawk lo tih kan pawm a ngai, inelna lian a champion loh chuan a eng zawngin thil ngaihtuah mah se a nunah nghawng ṭha lo a nei thei bawk. Hlawhtlinna chang turin thil tih danglam ngai a tam lo, chutih rualin tih danglam hret ngai chu a awm.

"Tennis court chhunga kan lut a nih chuan rilru zawng zawngin tennis chauh a ngaihtuah tur a ni a, thildang kan ngaihtuah tel a nih chuan a harsa tawh ṭhin," tiin a player chungchang a sawi.

Australian Open third round-a Chinese nula Wang Qiang a hneh loh hnuah khan Serena hian tihsual a ngah thu a lo sawi tawh bawk. Serena leh Mouratoglou te hi 2012 aṭang khan an thawkdun tawh a, an thawhdun chinah Grand Slam nomawi 10 an chawi tawh.

Serena hi kum 38 mi a ni tawh a, fa pakhat a nei tawh. Hmeichhe tennis player zinga Grand Slam champion hnem ber ni turin theihna a nei a, chutih rualin infiamna khawvelah a hun hnuhnung lam a nih tawh avangin atan theihtawp chhuah a ngai lehzual.