Sevilla dangtu De Gea kut
Manchester United tan chhandamtu dang an awm lo, a hming ngai goalkeeper David de Gea bawk a ni. Nilaini zan Champions League last 16 inkhelah Sevilla leh an mikhual Man United te goal awm loin an inhnehtawk, March 13 zan khian Old Trafford-ah second leg khelh a ni ang.
Spain international De Gea-a'n Joaquin Correa leh Steven N'Zonzi te pet goal ngei tura lang a dang thei a, dan hman loh tura ngaih Luis Muriel-a tauh chu a kut dinglamin rang zetin a beng per hman bawk! Tun season chhunga a vawi 19 nan clean sheet a nei.
Tun hnai kum li hnua Champions League knockout game khel leh United tan striker Romelu Lukaku-a'n hun ṭha ber a nei a, mahse Belgium international hian hnai tak aṭangin a pet chhuak luah, Alexis Sanchez thlaktu substitute Marcus Rashford-a'n hun tawp dawnah goal ban hrulah a pet chhuak bawk.
Sevilla lamin goal khung tumin vawi 25 zet pet mah se De Gea an paltlang zo lo a, chutih rualin an hmatawng an hriam tawk lo bawk. First leg inkhel bikah goal chhuah lo United hi a lawm zawk an ni ang. Jose Mourinho nauten tun season Old Trafford-a match 18 an khelhah vawi 15 hnehna an chang thei a, quarterfinal beiseina an la nei thei ang.
Bench-ah Pogba
Pound makatduai 89 man Paul Pogba chu bench-ah ṭhut nawntir leh a ni. Minute 17-na lekah hliam vangin Ander Herrera lak chhuah a ngai a, a thlak turin Pogba hi khelmualah a rawn lut.
Juventus midfielder hlui hi Huddersfield nen FA Cup an khelh ṭumin bulṭantir a ni lo tawh bawk a, Sevilla lakah erawh bul-
ṭan ngei tura ngaih a ni. Chutih rualin Mourinho chuan a player hi a dam lohna vangin a dinhmun a chian chiah loh thu a lo sawi lawk tawh thung.
United manager Mourinho-a'n 4-3-3 formation hmangin Pogba chu midfield vei lamah a taltir a, a khel chhe lo. Goal khung aia a venhim hna an thawh nasat avangin khelmual a luh hnuah Pogba hian a mawhphurhna a hlen ṭha thawkhat hle.
Kulhpui nghet
United hian an match hnuhung zawkah Huddersfield lakah inkhel thunun chungin si hnih faiin hnehna an chang, Lukaku-a'n goal zawnah vawi hnih petin a lut ve ve a, nuamsa takin hnehna chang mah se an goal nawr na tawk lo chu sawisel sak an ni tho.
Champions League-ah chuan Man United hian inkhel hmuhnawm leh ṭha zawk an chhawp chhuah theih beisei a ni. Mahse, Sevilla mualah United an bet a, Lukaku-a'n hun ṭha vawi khat nei ve leh mah se nidang angin a vannnei tawh bik lo.
Spanish club-in an mikhual United tlarhnung an su nghing fo a, Arsenal laka ropui taka a team chhanhim tawhtu De Gea kher ni lo se chuan goal an khung ngei pawhin a rinawm hle a ni.
Goal ven thiam Mourinho-a'n a tlarhnung a rem phui leh pek hle. Amaherawhchu, a laia ding pahnih Victor Lindelof leh Chris Smalling ten ven lohin forward Muriel an thlah zalen, Colombia international ropuina dangtu leh an tlarhnung mualpho tur chhanhimtu chu De Gea a ni.
Eng nge an sawi?
Sevilla coach Vincenzo Montella chuan, "Ka nauten huaisen leh rim taka an beihna ka hmuh khan ka lawm hle, kan khelh danah khan sawisel tur ka nei hran lo. Goal a la lut lo a, round sang zawk lut turin kawng a la inhawng," a ti. Montella hian khualmualah hnehna chan theih a nih thu a sawi bawk.
Manchester United manager Jose Mourinho chuan, "Talbuai lai kan nei tih chu phat tur a awm lo, hun ṭha pawh an insiam thei a, keeper ṭha De Gea-a'n a lo dang thung. Kan dinhmun hi a ṭha lo a, a chhia tia sawi tur pawh a la ni chuang lo," tiin an result chu lungngaihna tur a la nih loh thu a sawi.