A chungah Zarkawt BCA an awm dawn

Mizoram Super League Season linaah Zarkawt BCA-in a zawna an vawi li chak nan champion lai Mission Veng Vikings chu 74-70 in an hneh a, pakhatna ni chungin league round an khar dawn.

Zanin dar 7:30 hian Hawla Indoor Stadium-ah Zarkawt club-in league match hnuhnung berah chak la nei lo Mission Vengthlang Hollow an hmachawn ang.

MSL-ah hian a chak lo zawk pawhin point khat an hmu zel a, BCA-in match khat khelh la hma bakah an chunga awm Mission Veng point khatin pha lo mah se head to head-a an ṭhat zawk avangin table-ah a chung berah an awm chiang tawh.

Lalrina telna
Lalrina Renthlei-in Zarkawt BCA kawr hain Mission Veng Vikings an hmachhawn a, Tui­khuah­­tlang tlangval hian a club hlui hi dunk khum bakah a zavaiin point 24 zet a lut.

Amaherawhchu champion lai Vikings hian huaisen takin an bei let a, Lalrina an nei tawh lo chungin pawhin hun tawp thlengin an ṭang a, second tlem te awmah chauh chak tur a chiang.

A tawp minute khat
Vikings guard Michael F. Lalawmpuia'n minute 1.04 chiah a awm tawh tihin point hnih a lut a, 70-69 in hma an hruai hman.

Pressure sangah BCA guard Zonunsanga'n freethrow vawi hnih a lut a, point khatin hma a hruai pui leh a. Michael F-a bawkin Vikings tan mawhphurhna la mah se Lalrina'n a block sak a, Henry Lalramngaihawma'n freethrow hlawh chhuakin point khat belh nan a hmang a, Zarkawt club-in 72-70 in hma an hruai chiah.

Vikings lamin Zonunsanga an kawl ve tho a, ani hian second 7.2 chiah a awm tawh tihin 3-point luh a tum a, point 13 a neih tawh sa a neih belh lo. BCA lam tan Henry-a'n freethrow vawi hnih a luh belh leh a, 74-70 Zarkawt club-in hnehna an chang hram.

Hmasawnna awm!
Tun season hi MSL season lina a ni a, chawhruala entu tlem ber ṭumah a ngaih theih. Chu­tihrualin season tawp lam­­ah erawh player ṭhenkhat fitness a ṭha ṭan chauh a, inkhel hmuhnawm sawtin basketball ngainatute an ṭhanharh bawk avangin MSL boruak a nung.

Amaherawhchu zaninah erawh hmahruaitu ni chiang tawh Zarkawt BCA leh table mawngphaha dinhmun sawh­nghet tawh Mission Veng­thlang Hollow te an inkhelh dawn avangin entu tam a beiseiawm lo a, semifinal-ah erawh entu an tam tawh ang.