FIFA World Cup U17 khel nuapang rual : Tlai dar 2:00-ah Aizawl FC Vs Indian Arrows

All India Football Federation-in naupang ṭha rual chher hriam nan I League an hmang a, FIFA World Cup Under 17 player tam zawk chu an coach Luis Norton de Matos kaihhruaina hnuaiah team an din sak a, an hming chu Indian Arrows a ni. Nakin lawka India ram innghahna ni mai tur rawlthar ṭha rual hian vawiin tlai dar 2:00-ah Aizawl FC an hmachhawn dawn a, Rajiv Gandhi Stadium, Mualpuia inkhel turah en man a awm lo.

Coach thar Kashyap
Aizawl FC-in Paulo Meneses an ban a, Portuguese coach thlak nan Santosh Kashyap an lalut. Mumbai FC leh Salgaocar kaihhruaina hnuaiah Mizo club-in khualmualah match hnih an khel tawh a, vawiina an khingpui tur Indian Arrows nen 2-2 a an inhnehtawk bakah khualmualah Shillong Lajong an hneh lo.

AFC coach Santosh Kashyap chuan, "Kan inkhel tur zel kan thlir a, tunah chuan chak ngei ngei a ngai tawh. Kan buaina chu player inhliam a ni a, amaherawhchu chak turin kan la ṭha tawk a ni," tiin a sawi.

Mizo club hian inhliam vangin Nigerian defender Kareem Omoloja an chân a, Japanese striker Yugo Kobayashi an chhuah bawk. Afghan defender Masih Saighani chuan 'food poisoning' vangin Shillong Lajong a hmachhawn lo a, vawiinah pawh inkhel bul a ṭan dawn lo a, an player thar lak tur Nigerian striker Chidi Edeh lah a visa a la fel thei lo.

Kashyap hian foreigner pathum dang Alfred Kemah Jaryan, Leonce Dodoz leh Andre Ionescu te chuan inkhel bul an ṭan tur thu a sawi a, coach thar hnuaia Aizawl FC khelh dan hi hmuh châkawm tur chu a ni.

Arrows lam hi
Indian Arrows coach Luis Norton de Matos chuan, "FIFA World Cup Under 17 kha I League pawha inelna hautak zawk a ni a, ka naute inelna ṭha an hmachhawn avangin eng team pawh hmachhawn se an hlau lo. East Bengal-in min hneh ṭum khan injury time-ah chakna goal an khung a lawm namen loin an lawm a, chu chuan thil tam tak a sawi a ni," tiin foreinger nei lo chung pawhin India ram club ṭha an elphak thu a sawi.

Aizawl FC nena an inkhel tur sawiin Portuguese coach chuan, "Champion lai ni mah se a khelh ṭhat reng theih lo a, team ṭha tak erawh an ni. Kan match hnuhnung berah kan draw a, kan mual leh khualmual a dang a, chuvangin khelh dan hmang pawh a dang dawn. Duh thlang thei ni ila, tunah hian point khat min pe dawn ta se, lak nghal ka duh," tiin point khatah pawh an lungawi tur thu a sawi.

Mizo pahnih
Indian Arrows-ah Mizo pahnih Edmund Lalrindika leh Lalengmawia (Apuia) te an awm a, vawiin hian inlan ngei tura ngaih an ni.

Lunglei rawlthar Edmund-a hian Goa-a Mizo club an hmachhawn ṭum hian I League-a a goal hmasa ber a khung a, Vaivakawn rawlthar Apuia erawh a la inlan lo.

Indian Arrows coach Matos-a chuan, "Edmund hian ka beisei aiin goal a khung har a, mah se a la tlai lo. Amahah hian theihna sang tak a awm a, FIFA World Cup team-ah a tel ve loh avangin ka khelh dan hrethiam turin hun a mamawh a, goal a khung takah chuan inrintawkna nen a khelh chhoh zel theih ka beisei a, season tharah chuan ISL-ah pawh a khel tlak tawh ang," tiin a sawi.

Apuia chungchang sawi zuiin Arrows boss chuan, "A khelh tam loh chhan hi a thiam loh vang lam a ni lo a, a inhliam vang a ni. Tunah chuan inkhel turin a inpeih leh tawh a, mahni ram ngeia khelh hi a hlu a, khelhna hun pawh ka pe ang," tiin Mizo rawltharte chhawr a tum thu a sawi.

Super Cup?
Season tawpah I League club leh Indian Super League club te inelna tur a awm dawn. Team parukin playoff khelh ngai loin inelna an hmachhawn nghal dawn a, Aizawl FC erawh pasarihnaah an awm mek.

AFC coach Santosh Kashyap chuan, "Kan match apiang ṭha takin kan khel ang a, season tawpah kan dinhmun chu a hriat mai ang. Super Cup vang hian pressure neih kan tum lo," tiin Indian Arrows hneh phawt a ṭul thu a sawi.

Mipui chungchang sawiin Kashyap chuan, "Aizawl FC ka zawm chhan pakhat chu Mizo mipuiin football an tuina hi a ni a, Indian Arrows kan hmachhawn hunah pawh min ṭawiawm turin Mizo mipui kan sawm a ni," a ti.

Aizawl FC hian AFC Cup an khel dawn a, I League-ah Arrows zawh hian Minerva Punjab an tum ang a, Super Cup khel tura an elpui Gokulam Kerala te an mikhual ang.