MFA Cup-ah champion thar awm dawn
Vawiin chawhnu dar 1:00 hian GSA Playground, Mamit-ah Kolasib club hlun Project FC leh inelna thlengtu Mamit DFA club Kawrtethawveng FC ten MFA Cup vawi 18-na final an khel dawn.
Kolasib leh Mamit district-in MFA Cup champion thei club an la nei ngai lo a, vawiin hian mahni awmna district bung thar kai pui an awm dawn. Hei hian nomawi hlutna a tisang sawt ang.
Record thar!
Kawrtethawveng FC hian final lut turin Aizawl FC Junior an hneh thei a, he team enkawltu Chanmari West tlangval G. Lallawmawma chuan, "Kan team inlungrualna ber hi kan ṭhatna a ni. Mamit hian tun hmain MFA Cup first round an la pel ngai lo a, kan thlen chin zel hi record thar a ni a, nomawi nena sulhnu hnutchhiah kan tum a ni," tiin Mamit tan record siam zel a tum thu a sawi.
Team chungchang sawi chhunzawmin Lawma chuan, "Player chhuan tur kan nei lo a, hming langsar ber chu MPL-a Chhinga Veng kaipuitu zinga mi Lalrinhlua a ni. Amaherawhchu team inlungrualna a ṭhat avangin Aizawl FC Junior kan khelh ṭum pawhin chak phu zawk kan ni. Project FC inkhel hi kan zir chiang tawh a, kan intum tawk dawnin ka hria a, hnehna erawh kan chan ka ring," tiin Vanglaini a hrilh.
La tlawm lo
MFA Cup-a chak loh hmel la hmu lo Kolasib club hlun Project FC hi champion tura rinkai zawk an ni a, anni hian Kawrtethawveng FC 3-0 a sawptu Champhai DFA Academy chu 2-1 in an hneh thei a ni.
Project FC coach Joseph Zoremsanga chuan, "Mikhualna hmun ni mah se final-ah hian Kolasib aṭangin ṭantu ṭhahnem takin min rawn ṭawiawm an tum avangin entu lamah chuan kan hlauthawng lo. Kan thlenna Mamit Venghlun hian kawng engkimah min ṭawiawm ṭha a, an chungah kan lawm em em a ni," tiin Vanglaini a hrilh.
Kolasib club hian MPL Playoff an khel tawh a, MPL-a inlan tawh Dominic H. Lalruatfela leh Hmangaihzuala te an kawl bawk avangin player pawh an nei ṭha zawkah a ngaih a ni a, amaherawhchu final-ah chuan eng pawh thleng thei a ni.
Final Kalkawng
Project FC
Group Stage
AFC Junior 0–0 Project FC
Project FC 1–0 New Serchhip
PRO : Lalbiakkima 23'
Semifinal
CDFA Academy 1–2 Project FC
CDFA : Lallawmsanga 12'
PRO : Laldinmawia 3'; Lalremruata 47'
Kawrtethawveng FC
Group Stage
Kawrtekhawveng FC 3–1 Siaha United FC
KAW : Tlakhu 18' (OG); Lalthawmmawia 45+1', 51'
SIA : S. Beilysa 83'
Kawrtethawveng FC 0–3 CDFA Acaemy
CDFA : Vanlalkoha 23' (OG); Lallawmsanga 72';
Lallawmtluanga 87'
Bazar Veng 2–2 Kawrtethawveng FC
BAZ : MS Dawngliana 69', 71'
KAW : Lalchhandama 43' (P); Lalrinhlua 56'
Semifinal
AFC Academy 0–1 Kawrtethawveng FC
KAW : Lalrammuanpuia 45+3'