India record siamtu Jeremy

13th National Youth (Boys & Girls) leh 54th Men & 30th Women Junior National Weightlifting Championship neih mekah Jeremy Lalrinnunga chuan gold medal a la a, Mizo rawlthar duhawm hi 56kg huangah pakhatna niin India record thar a siam nghal a ni.

Vishakapatnam, Andra Pradesh-a inelna neihah Jeremy hian snatch-ah 115kg chawin, clean and Jerk–131kg a chawi bawk a, total-ah 246kg niin heti zata rit hi 56kg huangah chawi thei an la awm ngai lo.

Govt. Complex naupang dang Zakhuma chuan 56kg huangah tho hian snatch 101kg, clean and Jerk–125kg, total 226 kg chawiin bronze medal a la ve bawk. Kg 62 inelan huangah Jacob Vanlaltluanga chuan snatch 110kg, slean & jerk 123kg, total-ah 242kg chawiin silver medal a la bawk a ni.

He championship-a ti ṭhate hi April ni 20–30 chhunga neih tur Asian Youth Olympic Qualification-ah an kal dawn a, inelna hi Urgench, Uzbekistan-ah neih a ni ang. Asian level-a an tih ṭhat dana zirin Youth Olympic Games-ah an inlan leh thei ang.

Tun inelna bikah hian Mizoram ṭangin infiammi hmeichhia pariat leh mipa pali an kal a, MSSC coach K. Zonunsanga leh manager Malsawma Khiangte (SYS) ten an hruai a ni.

Mizoram manager Malsawma Khiangte chuan, "Mizo infiammi ten hma an sawn zel a, a bik takin tun hnaiah weightlifting huanga kan kal chhoh dan hi a lawmawm zual hle. Keini mai bakah Indian Weightlifting Federation lam pawh an lawm hle," tiin Vanglaini a hrilh.