Futsal Final : Chhinga Veng Vs Chanmari

Zanin dar 7:30 hian RFL Plastics MFA Futsal League final chu R. Dengṭhuama Hall, Mualpuiah an khel dawn. Aizawl veng lian pahnih Chhinga Veng leh Chanmari ten a thiam ber nih an tum ang.

A goal tam dawn
Final-a inhmachhawn tur team pahnih hi league round-ah an inkhel tawh a, Chanmari hian Chhinga Veng hi 5-4 in an hneh hram.

An inkhelh hmasak ṭumin goal kua ngawt a lut a, attacking game khel ṭhin ve ve an nih bawk avangin goal a lut tam ang.

Incho tawk
Chanmari coach Samuel Lalrinzuala Sailo chuan, "Kan intum hmasak ṭum khan kan tihsual vawi hnih avangin harsa takin kan chak a ni," tiin Vanglaini a hrilh a; Chhinga Veng coach Lalremruata'n an keeper vawi thum tihsual vang chauha chak loh an nih thu a sawi ve bawk.

Aizawl veng lian pahnih hian MPL-ah boruak an nei tawh a, tun season-ah football lamah Chhinga Veng an chungnung a, futsal lamah Chanmariin phuba lak an tum

Chamari coach Samu-a chuan, "Veng a nih tawh chuan eng inelna pawh nih se a pawimawh a ni. Futsal-ah hian history siama champion hmasa ber nih kan tum a, Chhinga Veng hneh hi kan duh a ni," tiin a sawi.

Player ṭha zawk
Chhinga Vengin an intawn hmasak ṭuma an chhawr loh Santosh Trophy-a Mizoram team-a tel Lalrammawia, Zosangliana, Hmingthanmawia leh Lalmalsawma te a neih belh a, an squad a ṭha sawt dawn.

Heng tawnhriat nei ṭha player-te hian futsal khel thiam Lalsawmzela (10 goals), C. Lalmuanpuia (6), Vanlalhriata (8), Vanlalthanga (3), C. Beithalo (4), Ronald Lalzikpuia (7) leh Vanlallawma (3) te an belh dawn a nia, team chhe zawka dah an har hle.

Chanmari lamin semifinal-a inhliam David Laltlansanga chu final-ah an chhawr thei dawn a, Chawnpui tlangval hian goal 14 zet a khung tawh.

Ani bakah hian MPL-a hming langsar ṭhiau Lalbiaknia (9 goals), Samuel Laltlanthanga (9), Rochhingpuia (7), Reuben Zosangpuia (5), Vanneihtluanga (5), Lalthasiama (4) leh Lalrammuanpuia (3) te an kawl a, inkhel a hmuhnawm dawn.

Entu tam
Chanmari coach Samuel-a chuan, "Mipui an phur a, bus kan hmang dawn a, entu an tam ang. Ticket hi veng chhungah kan zuar sa a, ṭawiawmtu kan nei ṭha ang," tiin mipui an tam tur thu a sawi.

Chhinga Veng coach Remruata chuan, "YMA inthlan a zo a, khawhar in kalna tur a awm tawh lo a, final a nih bawk avangin kan tlem ka ring lo. Kan veng mipui zawng zawng min rawn ṭawiawm vek turin kan sawm a ni," tiin supporter neih ṭhat a inbeisei ve bawk.

Lawmman
MFA Futsal League-ah hian champion hian Rs 80,000 an dawng dawn a, pahnihna hnenah Rs 50,000 pek an ni ang a, best player thlanchhuah tur niin Rs 5,000 a dawng bawk ang.

Semi final-a tla team hnih Durtlang leh Saron Veng ten Rs 20,000 ve ve an dawng a, quarterfinal-a tla team pali Dinthar, Ramhlun South, Armed Veng South leh Electric Veng ten Rs 10,000 ṭheuh an dawng bawk.