Neymar hnena Henry thurawn a thlum lo

Arsenal legend Thierry Henry chuan Neymar chu Lionel Messi hliahkhuhna aṭanga talchhuah a duh a nih chuan football ni loa infiamna dang luhchilh mai turin a hrilh!

Neymar hian nipui transfer lai khan khawvel barakhaihin Barcelona a chhuahsan a, footballer manto ber ni turin Paris Saint-Germain chu pound maktaduai 200-in a zawm.

PSG tan match 29 a khelh tawha goal 28 khungtu forward -in Catalan club a chhuahsan chhan hi khawthlang media-te chuan Messi hliahkhuhna hnuai aṭanga talchhuah a duh vang niin an sawi a, hei hi Henry chuan a chhang.

Barcelona-a Messi lo khelhpui tawhtu French striker chuan, "Neymar-a'n Messi hnuaia awm reng duh loin Barcelona a chhuahsan an tih hi a tak a nih leh nih loh ka hre lo"

"Mahse, he thuthang hi a dik a nih chuan Neymar hian a khelhna club ni loin infiamna a luhchilh zawk hi a thlak tur a ni a, football ni loin thil dang a luhchilh mai a fuh zawk ang. Footballer zawng zawng hi Messi hliahkhuhna hnuaia awm vek an ni," tiin Argentina captain a dah sang hle.