Intlansiak châk tawh Ricciardo

Car intlansiakna sang leh ngaihhlut ber season chawlh lai a ni a, March 25 aṭangin season thara intlansiak hmasa ber tur Australian Grand Prix tlan a ni ang–Red Bull driver Daniel Ricciardo chuan inelna neih a chak tawh thu a sawi.

Red Bull hian season hmasa khan Mercedes leh Ferrari te an phak lo a, kuminah chuan beiseina sang tak nen an car hman tur RB14 an pho chhuak tawh. Team lian pahnih tlan pelin world champion nih an tum dawn.

Kum 28 mi Ricciardo chuan, "Chawlh nei lai kha hrehawm ka ti, kei chuan inelna neih reng hi nuam ka ti a, car kan khalh ṭan leh ta hi a nuam hle. Ka hmuh dan chuan season hmasa aiin kan car hi a mawiin a ṭha zawk dawn a, phurna pawh min siamsak nasa hle," tiin a sawi.

Red Bull hian nikum ang bawkin engine leh khawl pawimawh dangah Renault V6 turbo hybrid a hmang leh. Mahse, an engine brand hmingah hian a siamtu French manufacturer Renault ni lovin Tag Heuer hming an chawi thung. 2016 khan Swiss sana company lar TAG Heuer nen inremna siam tawhin an team hming pawh Red Bull Racing-Tag Heuer tih a ni.

Tun season Formula 1-ah hian intlansiak 21 a awm dawn a, champion lai Lewis Hamilton leh Ferrari driver Sebastian Vettel te bakah Red Bull driver pahnihte an inel tawk chho hle tura ngaih a ni.