Real-in harhna an chan chhunzawm zel
Tun season-ah beisei an phak loh avangin sawisel hlawh mah se season tawp a hnaih meuh chuan Real Madrid-in an ze ngai an chhuah leh ṭan tawh a, a zawna match li an chakna ni turin Leganes chu khualmualah 3-1 in an hneh.
Real squad-a Cristiano Ronaldo hmel hmuh tur a awm loh zanah Madrid khaw club tan Lucas Vasquez, Casemiro leh Sergio Ramos ten goal khat ṭheuh an khung a, Portuguese forward tel lo pawhin goal khung tur an nei.
Zinedine Zidane-a nauten match li a zawna hnehna an channa kawngah Champions League last 16-a Paris St-Germain 3-1 a an hneh a tel a, heti zat hnehna chang tur hian goal 16 ngawt an khung–La Liga lamah pathumna an ni leh tawh a, season tharah Champions League an khelh ngei a beiseiawm.
Phuba chu
Copa del Rey quarterfinal-ah Leganes hian rin loh takin Real Madrid an lo hnawt chhuak tawh a, Real season duhawm lo belhchhah saktu-ah an lo ṭang tawh–Nilaini zan inkhelah pawh rin loh takin mualneitu team hian Unai Bustinza hmangin minute rukna lekah goal hmahruai an khung a, Real an hawihai.
Mahse, Real-in Spanish Cup-a thil thleng tawh thlen nawn tir an duh lo. Goal an chhuah aṭanga minute nga hnu lawkah Lucas Vasquez chuan si phurh sutna goal a khung–Spanish forward tan tun season-a a goal sarihna chiah a ni.
Minute 29-na a ni a, Real bawkin goal an khung chhunzawm–Brazilian midfielder Casemiro chuan tun season-a a goal ngana ni turin hmahruaina goal a khung a, Lucas siamsak a ni. Minute 90-naah Real-in Ramos-a penalty hmangin chak an nemnghet a, Leganes tan talchhuah theih a ni tawh lo.
Zidane a hlim
Real squad-ah Ronaldo a awm lo a, Gareth Bale chu bench-ah dah a ni bawk–hetichung hian Real-in goal khung an harsat lo a, coach Zinedine Zidane chuan a bik takin Lucas Vasquez a fak.
French manager chuan, "Lucas hian goal khung a phu a, a khung ngei bawk avangin ka lawmpui takzet a ni. Inkhelh hma khan a nuamsam lo a, mah se huaisen taka beiin Marco Asensio leh Mateo Kovacic te nen khan an khel ṭha hle a ni," a ti.
Zidane chuan a player zawng zawng a ruala a chhawr reng theih loh thu sawi nghalin, "He hmunah hian player 25 ka nei a, khelh reng hi thil harsa a ni tih an hre vek. A pawimawh ber chu an hun ṭha neihah a ṭha thei ang bera an khelh zel hi a ni," a ti a, a hlim hle.
Bale-a dinhmun
Tun hnaiah Chelsea nena sawizawm an nih avangin Gareth Bale-a'n chanchin a ngah a, Zidane-a hnuaia hlim lo forward hian an coach chu chhuahah a vau ni hialin Spanish media ṭhenkhat chuan an lo tarlang tawh–Leganes lakah hian minute 14 a la awm tihin tlan luhtir a ni.
Zidane chuan, "Bale-a chungah ka hlim em em a, mah se kan hmanhmawh loh a pawimawh. Kan duh ber chu a ṭhat dan berin khel chhuak leh se tih hi a ni a, chu chu kan hmachhawp a ni," tiin hliam vanga rei tak chawl tawh Welsh winger chhawr tura a hmanhmawh loh thu a sawi.
Real legend chuan, "Ka player-te zawng zawng ka ring tawk vek a, ka mamawh huna chhawr theih tura an awm hi ka duh ber a ni," a ti a, duhsak bik a nei lo.