Aizawl FC harhna thlentu Kelkang tlangval

Mizo club Aizawl FC-in match kaw chhung chak hmel an hmuh loh hnuah nimin khan Kelkang tlangval Lalkhawpuimawia (Mapuia) goal hnih an chakpui - Indian Arrows chu 3-0 in an hneh.

Coach thar Santosh Kashyap-a hnuaia RG Stadium-a an match hmasa berah point thum an hlawh chhuak.

I League champion lai Aizawl FC hian Mapuia goal hnih bakah Andrei Ionescu-a 'n goal khat a khung. Tun dinhmunah playoff khelh ngai loa Super Cup khel pha chin paruknaah an inhlangkai a. Mapuia chu hero of the match-ah thlan a ni.

AFC thar!
Aizawl FC-in foreigner dam ṭha pathum Alfred Kemah Jaryan, Andrei Ionescu leh Leonce Dodoz ten bul an ṭan vek a, keeper-ah Avilash Paul awmin midang pasarih chu Mizo an ni.

Defence laiah Mizo pathum defender thar Lalchhawnkima, Lalrozama Fanai leh Hmingthanmawia te an awm a, wing back-ah R. Laldinliana leh Lalramhmunmawia te an awm. Midfield-ah David Lalrinmuana awltir a ni a, Lalṭhathanga Khawlhring chu mual vei lamah awmin tlar hmaah Mapuia a awm bawk.

Paulo Meneses-a hnuai leh coach thar Santosh Kashyap-a hnuaia Aizawl FC khelh dan a inang lo.

Goal 3 leh 3 points
Aizawl FC-in Leonce Dodoz hmangin chance ṭha an nei nghal, match hnuhnung pahniha goal khungtu Ivorian forward hian khung lo mah se Mizo club-in goal khung turin hun mamawh rei lo.

Minute 7-na lekah Mapuia'n ṭha takin a lalut a, Romanian midfielder Andre-a'n goal khung nan a hmang. MPL-a Chhinga Veng champion puitu Mapuia hian minute 16-naah Dodoz a ball pek chu goal ban pahnih pet per nana a hman hnuin a zawnah rawn let lehin chiang takin a pet goal.

Aizawl FC-in goal an venghim ṭha a, Indian Arrows tan chance ṭha siam loin counter attack hmangin vaw let na mah se first half-ah goal an khung belh lo.

Second half ṭan tirhah erawh Mizo club tlarhnung a nghing a, Anwar Ali-a goal khung tur chu AFC keeper Avilash Paul-a'n ṭha takin a dang a, East Bengal keeper hlui hian Nongdamba Naorem khungtu a dang leh bawk.

AFC pawhin chance ṭha an nei ve tho a, Dodoz-a'n keeper chauh a hmachhawn hnuah crossbar a pet per a, Mizo club bawkin goal chance an ngah zawk. Hun tawp hma minute thum la awmin Dodoz-a pekluh ṭhat zar zoin Mapuia'n a goal hnihna a khung.

Edu leh Apuia
Indian Arrows-ah Mizo rawlthar pahnih Edmund Lalrindika leh Lalengmawia (Apuia) ten bul an ṭan. Minute 78-naah Edu hi inhliam vangin lakchhuah a ni a, hemi hma hian Lunglei rawlthar chuan ṭha taka lalutin goal kham chungah a pet chhuak.

Vaivakawn rawlthar Apuia hian inhliam vanga rei tak a chawlh hnuah Indian Arrows tan I League-ah a vawi khat nan a rawn inlan a, midfield-ah ball semtu a ni. Portuguese coach Luis Norton de Matos-a'n Mizo rawlthar pahnih khelh danah a lawm thu Vanglaini a hrilh.

Coach thlirna
Indian Arrows coach Matos-a chuan, "Keini tan chuan training ṭha tak a ni a, kan chak leh chak loah buaina kan nei lo. Artificial turf-a khelh hi a harsa a, hei bakah hian team pahnih danglamna chu foreigner a ni," tiin inkhel chungchang a sawi.

Aizawl FC coach Santosh Kashyap chuan, "Indian Arrows laka kan khelh danah ka lungawi a, hmasawnna tur erawh a la tam hle. Team naupang ni mah se khelh an awlsam lo a, point thum hi a hlu a ni," tiin a sawi.

Mizo club hian February 26 hian Minerva Punjab an hmachhawn dawn a, vawiin hian Punjab lam panin Aizawl an chhuahsan ang. Parukna ni tura Mizo club elpui Gokulam Kerala chuan vawiin tlai dar 5:30 hian Goa-ah Churchill Brothers an hmachhawn ang.