Nomawi hmasa ber inchuhna Wembley-ah Arsenal vs Man City

Arsene Wenger leh Pep Guardiola ten a vawi khat nan Carabao Cup chawi an tum dawn. Pathianni zan dar 10:00 hian Wembley Stadium-ah Arsenal leh Manchester City ten tun season chhunga nomawi hmasa ber an inchuh ang.

Manchester City tan League Cup final vawi rukna tur a ni a, tun hnai kum nga chhunga a vawi thumna tur a ni. Spanish manager Guardiola tan hun pawimawh a ni dawn, Barcelona manager hlui hian City a enkawl china final a vawi khat khelhna tur leh nomawi hmasa ber ni thei tur a ni ang.

Arsenal manager Wenger-a'n League Cup hi a ngai pawimawh lutuk ngai lem lo, player naupang chher nana a hman ṭhin avangin 1996 aṭanga Gunners a enkawl hnuah final vawi thum lut tawh mah se nomawi an la chawi ngai lo - City an hneh chuan Wenger tan League Cup hmasa ber tur ve tho a ni bawk.

Rinkai City?
Premier League hmahruaitu Man City hian West Brom, Wolves, Leicester City leh Bristol City hnehin final hi an lut a, nuamsa takin final hi an inpet kai bik lo. Foxes leh Wolves te penalty-ah an hneh hram a, match dangah pawh harsa tak vekin hnehna an chang.

Kum 47 mi Guardiola-a'n July 2016 aṭangin City a enkawl ṭan a, tun ṭum hi a match 99-na tur chiah a ni - match 98 aṭangin vawi 13 chiah chak loh a la nei, tun season league match bikah phei chuan tuma elphak loh an ni. Club lian paruk an hmachhawn tawha point 18 hmuh theih aṭangin point 15 zet an hmu.

FA Cup aṭanga tla hlim City hian player lei nan sum an hmang hnem a, Pep leh a naute hi nomawi duhin an tuihal–an ṭhat dan berin an inlan ang; goal veng tur erawh chuan Claudio Bravo a lut thung tura ngaih a ni.

Argentine striker Sergio Aguero khelh ṭhat lai a ni a, tun season-a goal 29 khung tawh Aguero bakah Gabriel Jesus a dam tawh bawk. Tlarhnung phui tawk lo Arsenal tan City hmatawng pahnih hi hmachhawn an châkawm loh hle ang.

Blues hnehtu
Arsenal hian semifinal-ah Premier League champion Chelsea an hneh a, hei hi Pep-a naute tan ral kher dar a ni ang. Blues hma hian Doncaster Rovers, Norwich City leh West Ham te an pet chhuak bawk.

Champions League khel phak lo Arsenal hi Ningani zan khan an mikhual Ostersunds FK lakah 2-1 in an chak lo a, mahse khualmualah si thum faia hnehna an chan tawh avangin 4-2 in Europa League round of 32 aṭangin an tlang tho.

Wenger-a'n season dang zawng aiin nomawi a mamawh zual a, Europa League-ah pawh hian Jack Wilshere, Laurent Koscielny leh Mesut Ozil te a dahṭha-damkawr midfielder Aaron Ramsey pawh a inlan thei tawh tura ngaih a ni bawk.

Amaherawhchu, Wenger hian a zia a la thlak vek lo. League lama a chhawr rim Petr Cech aiah David Ospina a chawr zui hmel a, hnehna chan a duh a nih chuan a player manto ber Pierre-Emerick Aubameyang hoa an thawhchhuah a ngai ang.

Ozil vs De Bruyne
Season kal laia Premier League midfielder zinga hmuhnawm bera chhal ngam chu Kevin De Bruyne a ni. Belgium international hian cup final a vawi hnih a khelhna tur a ni a, Wembley-ah a vawi hnih inkhelhna tur chiah a ni bawk.

Arsenal thiampuipa Mesut Ozil erawh England national stadium-ah hian vawi kua a inlanna tur chiah a ni a, ram leh club tan final vawi 10 chuang a khel tawh bawk–an sulhnu bikah chuan De Bruyne chungah a awm.

Amaherawhchu, tun hma thil sawi theih a ni lo, a pawimawh ber chu tun hun hi a ni. De Bruyne hian tun seasson league bikah a ṭhiante khung tur vawi 14 a siamsak tawh a, tuman an tluk lo; Ozil erawhin vawi sarih chiah assist a la nei thung. Player pahnihte hi inkhel boruak thlak danglam thei an nih avangin an koah mawhphurhna a tla sang hle ang.