Tri series-ah Virat Kohli a tel dawn lo

Twenty20 tri-series khel turin India an inbuatsaih a, March 6 aṭanga khelh ṭan tur inelnaah hian India captain Virat Kohli chu a tel dawn lo niin an sawi.

Kum 29 mi batsman hian India-in match an ngah ṭhin lutuk leh chawlh hahdamna hun awm lo chu a lo sawisel tawh a, Sri Lanka-a tri series khelh turah chuan awl tir a ni dawn ta a ni.

Nidahas Trophy tia hming an vuah tri-series-ah hian inelna thlengtu tur Sri Lanka, Bangladesh leh India an inhmachhawn ang a, Kohli awm loh hlanin Rohit Sharma chu captain a ni ang.

Kohli bakah hian Jasprit Bumrah leh Bhuvneshwar Kumar te chu chawlh hahdamna hun pek an ni dawn nia tarlan a ni bawk a, Board of Control for Cricket in India (BCCI) lam aṭangin thuchiang engmah a la awm lo thung.

India hi South Africa-ah series khelin an zin mek a, zanin dar 9:30-ah T20 series match thum an khelh tura match hnuhnung ber an khel dawn–1-1 in an inhnehtawk mek a, zanina chak zawkin series an la ang.