MFA Cup-ah Mamit club an champion

Kawrtethawveng FC chuan nimin khan GSA Playground, Mamit-ah Kolasib club hlun Project FC chu penalty shootout-ah 5-3 in an hneh a, Mamit District aṭanga MFA Cup-a champion hmasa ber an ni.

Kolasib District club zingah erawh nomawi chawi thei an la awm lo a, an hun ṭha an bawhpelh avangin season thar an thlir a ṭul dawn a ni.

MFA Cup vawi 18-naah Project FC player Lalsangzela chu best player-ah thlan a ni a, goal nga khungtu Champhai DFA player Lallawmsanga chu top scorer a ni a, pahnihna Project FC hian fair play award an dawng.

Final chu
Inelna thlengtu Kawrte-thawveng FC forward Lalrinhlua chuan hun ṭha a nei a, Chhinga Veng FC player hlui Rinhlua hian yard ruk leka hnai aṭangin pet mah se Project FC defender-in an dan sak hman a, hei chiah hi chance ṭha bik tiha sawi theih a awm.

Mamit DFA Club lamin first half an thunun a, second half-ah Project FC insiamṭhain inkhelah chungnung zawk mah se goal an khung thei bik lo.

Minute 90 chhungin goal a lut lo a, extra time-ah team pahnih an intluk tawk a, minute 120 chhungin goal hmuh tur a awm lo.

Extra time-a thil thleng langsar erawh Kawrtethawveng coach G. Lalawmawma'n hun tawp hma minute kua chiaha awm tawh tihah penalty shootout thlir chungin goalkeeper Vanlalvoha la chhuakin Lalruatmawia a luhtir, a tifuh hle. Kawrtethawveng player ten penalty an khung vek a, substitute keeper Ruatmawia'n a penalty hmachhawn hmasak ber a dang a, 5-3 in hnehna an chang.

History
Kawrtethawveng coach Lawma chuan, "Nomawi kan chawi theihna chhan chu kan thawhhona ṭhat vang a ni a, inelna neih ṭantirh aṭangin kan ṭangrual em em a, a tawpah a rah duhawm kan seng ho a ni," tiin history an siam thei chu lawmawm a tih chu a sawi.

Mamit DFA club hian tun hmain MFA Cup first round an la pel lo a, tunah chuan nomawi an chawi ta.

Chanmari West tlangval Lawma chuan, "Tualchhung football hmasawn nana thawktu MFA chungah kan lawm a, kawng engkima min kaihruaitu leh min puitu Mamit DFA chungah kan lawm takzet a ni," tiin Vanglaini a hrilh.