Mourinho vs Conte A hun a thleng dawn ta

Premier League-a Jose Mourinho leh Antonio Conte ten club an enkawl hmasak ber chu Chelsea a ni a, manager ropui pahnih hian London club hi an season hmasa berah an champion pui ve ve bawk - Pathianni zan dar 7:35-ah Mourinho enkawl Manchester United-in Conte-a team Chelsea an mikhual dawn.

March 14, 2017 FA Cup-a Chelsea-in United an hneh ṭumin Stamford Bridge-a fans ṭhenkhatin ropuina rama hlangkaitu Mourinho an au el a, tlawm duh lo Portuguese manager chhanletna chu, "In tan number one ka la ni reng," tih hi a ni.

Premier League-ah Chelsea an champion a, Mourinho ropuina theihnghilh a ni a, Conte fakna hlain Stamford Bridge a thangkhawk - July 2017 a ni a, Conte-a'n, "Mourinho anga Premier League nomawi chawi hnu season-a ban nih ka hlau," a ti a, manager pahnih inkar boruak a ṭha leh tawh lo.

Conte-a thusawi a fuh tawk lo - tun season-ah beisei an phak lo a, Italian manager hi ban mai theih dinhmunah a ding reng. Mourinho hi chu thil thlentir tu chu a nih pawhin a mak lo ang.

The Specialist
Portuguese manager Mourinho chungchang sawi a nih apiangin rilru hmanga a game khelh ṭhinna chu fak hlawh a ni - he manager hian manager langsar tak tak Arsene Wenger, Rafael Benitez leh Sir Alex Ferguson te a thluak hmangin a lo chhaih buai tawh.

January leh February chhoah Mourinho-a'n nasa takin Conte a bei a, Italian manager hian chhanglet ve ṭhin bawk mah se Juve boss hlui hi a talbuai tih hai rual a ni lo - February thla tirah Bournemouth leh Watford a zawnin a hneh lo.

Khelmual pawna an inbeihna avanga hmingthang manager pahnih an intawng dawn ta ngei a, khelmual chhunga chak zawk zawn hun a thleng ta - a chak lo zawk tan point thum hlohna tur a ni satliah lo a, mualphona leh hmingṭhatna keng teltu inkhel a ni.

Mahse maw...
Conte leh Mourinho inbeihna boruakin reh lam a pan a, Chelsea-in West Brom leh Hull City a zawnin an sawp a, inkhel hmuhnawm lantir chungin Barcelona chu Stamford Bridge-ah an chelh - hei hi Manchester United nena an in an lohna chu a ni.

United-in Spanish club ṭha zingah pawh chhiar tel ni lo Sevilla laka draw result hlawh chhuak turin vanneihna an mamawh tel a, inkhelh zawha fak hlawh ber chu goalkeeper David de Gea a nih miau avangin hei hian an dinhmun chiang takin a hrilhfiah. Chelsea phur vanglai a ni a, United insiamṭhat tumlai a ni - hei hian inkhel hmuhnawmna a belhchhah dawn.

Conte-a'n Olivier Giroud nge Alvaro Morata a luhtir dawn? Nge Eden Hazard, Willian leh Pedro a intlar tir leh dawn? Red Devils tan match hnih bench-a dah tawh Paul Pogba a inlan ang em? Romelu Lukaku-a'n 'big game' player a ni tih a pholang tawh dawn nge Alexis Sanchez, Marcus Rashford leh Anthony Martial inkawpin Blues an pal darh dawn? Pathianni zanah Old Trafford-ah a chhana pek kan ni ang.