'Pressure' duhin Everton ka pan - Rooney

Everton striker Wayne Rooney chuan Manchester United a chhuahsan dawnin China aṭanga sum tam tak hlawh tura sawmna hmu mah se Merseyside club chu boruak sang tak hnuaia inkhelh reng duha a pan thu a sawi.

United captain hlui hian nipui transfer lai khan a chawr chhuahna club hi kum hnih chhung khelhsak turin a pan a, Chinese Super League-a kal mai tura rinna awm chu a thai bo. Rooney chuan, "Ram pawn lamah sum tam tak hlawhin ka inkhel thei tih ka hria a, mah se chutiang mi chu ka ni lo.

"Hmachhawp hautak neih zel ka duh a, pressure sang tak hnuaia khelh ka duh. Sum umin hmun dangah kal ni ila heng ka rilru puthmang zawng zawng hi ka thai bo dawn tihna a ni," a ti.

United tan match 559 a khelha goal 253 khung thei striker chuan, "Everton-a ka kir chuan beiseina a sang dawn tih ka hria a, chu tak chu ka beisei a ni bawk si. Everton fan-te hnenah ka theihna pholan a, he club tana nomawi chawi hi ka duh. Ka beiseina hi tun aṭanga kum hnih emaw kum thumah chuan kan tih hlawhtlin theih pawh ka beisei a ni," tiin a sawi.

Rooney hian kum 2004 khan Everton chhuahsanin Manchester United a pan a, a hunlaia a man zat hi pound maktaduai 27 niin Premier League nomawi panga, Champions League, Europa League leh FA Cup nomawi pakhat ṭheuh a chawi bawk.

Everton hian zanin dar 11:00-ah Premier League match khel turin Watford chu khualmualah an lenchilh ang.