Mercedes leh Ferrari inpho chhuak

Formula 1 team hlun leh hlawhtling pahnih Mercedes leh Ferrari te chuan season thara an hman tur car thar chu an phochhuak ve leh ta a, anni pahnih hi inum tawk leh hle tura ngaih an ni.

Team pahnihte hian season hmasa lama an car hman zulzuiin an siam leh a, Marcedes lam hian thir hman an ti tlem deuh a, Ferrari lamin season hmasa lam aia tlan chak leh tlo zawk tur niin an sawi thung.

Italian team Ferrari hian season hmasa kha bulṭan ṭha viau mah se September leh October chhungin Malaysia leh Japan-ah an talbuai a, an driver pahnih chet fuh loh lam ai mahin an car chuan sawi zui a hlawh zawk.

Mercedes lam hian Ningani khan Silverstone tlankawngah an car hi enchhinna an nei a, chawhma lamah Valtteri Bottas-a'n khalhin chawhnu lamah Lewis Hamilton chuan an rawn leu pui ve leh thung a ni.

Mercedes team boss Toto Wolff chuan, "Formula 1 car awm tawh zawng zawng zinga ṭha ber an neih a beisei a, chutih rualin kan thir hman kan tih tlem avangin harsatna leh buaina thleng palh thei a ni ve bawk," tiin a sawi.

Ferrari technical director Mattia Binotto chuan, "Keini lam chuan hamsawnna tur kan neih zawng zawng kan zirchiang a, tlan chak theih vak lohna hmunah pawh ṭha taka tlan thei turin kan ruahman a ni," a ti a, Sebastian Vettel pawhin season hmasa lama an hman car ai chuan beiseina an neih san tawh hle thu a sawi bawk.