Serie A hmahruaitu Napoli an tla
Europa League last 32 aṭangin Napoli chu pet chhuah an ni a, a thiam 16 zingah Serie A hmahruaitu an tel pha lo. Nimin khan Europa League last 16 draw neih nghal a ni a, English club Arsenal leh Italian club hlun AC Milan te an inhmachhawn dawn.
Goal 2 a tawk lo
Ningani zan khan Serie A hmahruaitu Napoli hian RB Leipzig chu 2-0 in luhchhuah mah se first leg-ah 3-1 a an tlawm tawh avangin away goal rule hmangin Bundesliga club an tlang.
Napoli hian Piotr Zielinski leh Lorenzo Insigne te goal khung chu tlang pui zo lo mah se coach Maurizio Sarri a lungngai lo, league nomawi an beisei zui tur thu a sawi.
Sarri chuan, "First leg-ah khan tihsual kan ngah a, kan ngaihthah deuh vang pawh a ni. Khualmualah khel ṭha viau mah ila a chanve hmalam kan chetfuh loh kan tuar a ni. Kan tan season a tawp tihna a la ni lo a, hun rei tak kan neih tawh loh league nomawi kan beisei chhunzawm ang," a ti.
Kum 1990 hnuah Napoli hi Serie A champion an la ni leh ngai lo a, kuminah beisei an nei sang hle. Champion lai Juventus aiin point khatin an sang zawk a, Napoli hian league match khel turin Thawhṭanni zanah Cagliari an lenchilh ang.
Inkhel dang
Italian club lian dang Lazio erawh match hmasa zawkah si khat faiin tlawm mah se Steaua Bucharest chu 5-1 in an hneh let a, belkhawmah 5-2 in an tlang. AC Milan pawhin Ludogorets 4-0 in an hneh bawk a, league lama che ṭha tawk lo Milan tan result lawmawm a ni.
Champions League last 16 lut phak lo Atletico Madrid tan hna harsa a la awm lo. Spanish club ṭha hian FC Copenhagen chu 5-1 in an sawp. UCL aṭanga tla dang Celtic chu an mangchhia aṭangin an la harh chhuak thei chuang lo, Scottish champion hi Zenit St Petersburg lakah 3-1 in an tlawm zui.
Arsenal vs Milan
Europa League last 16-a chanchin ngaihven hlawh tur chu Gunners leh Milan inkhel tur hi a ni. Champions League nomawi vawi nga chawi tawh Milan leh Gunners te hi kum 1995 hnulamah vawi ruk an inhmachhawn tawh a, an inkhel tawk hle - vawi hnih inhnehtawkin vawi hnih ve ve hnehna an chang.
An intawn hnuhnung ber chu 2012 March kha niin Arsenal hian goal thum faiin hnehna chang mah se San Siro-ah 4-0 in an tlawm a, chak lo zawk tura ngaih tawh Milan an tlang.
La Liga pahnihna ni lai Atletico Madrid-in Lokomotiv Moscow an hmachhawn dawn a, German club Borussia Dortmund leh FC Salzburg te an intum dawn. Last 16 hi March 8 leh 15-ah khelh a ni ang.