Highlanders an sang hleithei lo

NorthEast United tan Mizo pathum Robert Lalthlamuana, Lalrindika Ralte leh Lalrempuia Fanai ten Mumbai City lakah inkhel bul ṭan vek mah se an team hi hnehna an chanpui zo lo a, an mikhualna ramah 3-2 in an tlawm.

Lucian Goian 'own goal' leh Sambinha goal hmangin Highlanders-in vawi hnih ngawt hma hruai mah se Mumbai City-in Achille Emana leh Everton Santos hmangin an chhanglet a, Goian-a chuan an lama a pet goal thup mawi nan injury time-ah chakna goal a khung.

Fittest Player of the Match-a thlan Didika a khel ṭha a, Highlanders tana Sambinha tauh luh chu Lunglei tlangval corner aṭanga lut a ni.

Lalrempuia Fanai-in a hun ṭha neihah player ṭha a ni tih a pholang a, Lunglei rawltharin John Mosquera tana a siamsak ṭha zet chu Werder Bremen striker hlui hian uiawm zetin a hlah a, Robert Lalthlamuana'n hun remchang a siamsakah Rempuia hian shot nei ṭha hle mah se Amrinder Singh chuan ṭha zetin a dang bawk.