Republic an huaisen, TKS an fing

Mizoram Super League season linaah Republic VR4-in huaisen takin an match hnuhnung berah Tuikual South hmachhawn mah se coach KC Lalliantluanga hoten fing takin an bei let a. TKS hian 65-62 a hnehna changin semifinal an lut. VR4 erawh MSL khel zel turin relegation playoff-ah Mission Vengthlang Hollow an hneh a ṭul a dawn a ni.

Ningani zan Hawla Indoor Stadium-a inkhel zawh rual hian MSL4 team parukte dinhmun a chiang nghal a, league round erawh nizan khan a zo chauh thung. Semifinal-ah hmahruaitu Zarkawt BCA leh palina Khatla TBL te an inkhel dawn a, pakhat zawkah champion lai Mission Veng Vikings leh pathumna Tuikual South te an inkhel ve thung ang.

A tam lua e
Republic VR4 hi Khatla TBL an hmachhawn ṭumin chak thei dinhmuna an din hnuah 63-69 in an tlawm a; MSL-a vawi hnih champion tawh TBL hi Tuikual South lakah an tlawm zui avangin MSL kai thar hian semifinal thleng turin hmabak hautak zet paltlang a ngai.

VR4 tan Tuikual South hneh hrim hrim hi a harsa tawh a, point ruk khera hnehna chan ngai chuan an harsatna a belhchhah. Amaherawhchu Republic VR4 hian beiseina nen Tuikual South an hmachhawn a, MSL4 inkhel hmuhnawm zingah a tel pha hial.

Republic Veng hian Lian­hming­mawia (17 pts, 12 rb), Lal­pekhlua (15 pts, 3 rb), Lal­chhan­dama (12 pts, 11 rb) leh Dar­liansanga (10 pts, 11 rb) ten MSL kaithar beiseina an chhi nung a, quarter thumnaah chuan point 12 ten hma an hruai pha hial.

Amaherawhchu hun tawp lamah VR4 an chesual leh a, point ruk tala chak an mamawh tih an hriat avangin pressure an ngah a, hun a tawp meuh chuan TKS-in 65-65 in hnehna an chang.

Game plan
Quarter hnihna leh thumnaah Tuikual South che chhe mah se coach KC-a talbuai duh lo a, game plan tihlawhtling thei tur player a nei bawk.

TKS hian quarter tawp bera point an mamawh lai takin an player pawimawh Lalnunpuia Renthlei la chhuakin guard che rang Lalfakzuala an dah lut a, MSL kai thar team hi pressure na tak pein an talbuai tir a, 'fast break' ah point an nei hnem hle.

Hun pawimawhah captain F. Zodinthara'n (14 pts, 6 rb) a chakna leh finna hmangin team a tiphur a, hun pawimawh K. Vanlalruata leh Lalfakmawia te tawnhriat ngahna a lang a, VR4-a player palian te an chhaih chau. Hun tawp dawn hnaiah semifinal kawng an zawh theih nan R-a (17 pts, 11 rb) rawn lut lehin harsatna hranpa nei tawh loin team a chakpui.