Zonuam an thiam ber

MFA Division One Futsal Tournament final February 22 zana khelhah Zonuam FC chuan IDBI Capital, Tuikual North 2-0 hnehin an champion.

R. Dengṭhuama Hall, Mualpuia inkhelah hian first half-ah goal a luh loh hnuin Zonuam tan Lalhruaizela (34') leh PC Lalṭhazuala (Puitea) (43') ten second half-ah goal an khung.

Goal hnih luh hnuah IDBI Capital player Thomas Lalengkima'n penalty a khung lo a, rinkai zawk Tuikual North club an tho chhuak thei lo.

Zonuam lamin no­mawi chawi ngei tumin mipui ṭhahnem tak nen hall an pan. Ṭantu an neih ṭhat avangin Zonuam player-te pawhin inrintawkna nen an khel a, goal ven­him kawngah MPL club Reitlang FC (Zo United FC) tana khel tawh Lalthlamuana (Tamu-a) a ṭangkai a, kumin NM Gupta best player Lalrem­ruata te tan goal khungna hun an siam sak lo.

Tlarhma lamah Hruai­tea leh Puitea te an ṭangkai a, MPL-a tawnhriat nei ṭha Puitea hian a thiamna futsal hmangin a pho chhuak a, goal hnihna khung tura defender rilru tih pen nana ball a chhaih vel pawh a mawi hle.

Final-a khel ṭha zawk Zonuamin hnehna an chang a, champion team hian trophy leh Rs 10,000 an dawng a, pahnihna hian trophy leh Rs 5,000 an hawn ve bawk. Semifinal lama chak ta lo Vengthar United, Kawn­pui leh Otei FC ten Rs 2,000 ve ve an dawng.