Hamilton ka hneh thei ang - Verstappen

Max Verstappen chuan Formula 1 season thar lo awm tur a thlirlawk a, champion lai Lewis Hamilton chu hneh theih ngei a inbeisei - chutih rualin car neih ṭhat a ngaih thu a sawi tel bawk.

Dutch tlangval hian Red Bull car a khalh mek a, tun hnaia hnehsawh taka team championship roreltu Mercedes chu elphak a inring. Verstappen chuan, "Lewis hi khawvela a 

ṭha berte zinga mi chu a ni ngei mai, a hnenah Pathian a awm pawh a ni mai thei, mahse amah hi chu pathian a ni lo.

"Na taka kan el thei a nih ngat chuan atan pawh inelna hmachhawn a harsat phah ve ngei ang," a ti. Britain tlangval chu hneh theih lo khawpa ṭha leh chungchuang bik a ni lo tih a ringnghet a, season thar a nghahhlelhawm phah sawt.

Season hmasa khan Red Bull leh Honda an thawkdun ṭan a, an driver Verstappen chuan intlansiak pathumah hnehna changin championship lamah Mercedes driver pahnih Hamilton leh Valtteri Bottas te chiah tluk loh a nei.

Kum 22 mi Verstappen chuan, "Kan car hman tur hi enchhinna neih hun a nghahhlelhawm tawh hle, keichuan beisei ka nei sang khawp mai. Kei chauh ni loin team chhunga midang pawh kan phur tlang hle, nikum aiin hma kan sawi ngei ang," a ti.

Red Bull car thar hi February 12, Nilaini hian Silverstone-ah tlan chhinna an nei ang, chumi hnuah chuan season thar inbuatsaih turin Spain ramah enchhinna an nei zui leh dawn a ni.