Team hmuhnawm Liverpool an chak

Barcelona hnena Philippe Coutinho an hralh hnuah 'Salah, Mane, Firmino' tih hla phuah chungin Liverpool fans an inhnem a, an inhnemna player-ten inhnemna tlak an nihzia an pholang zel–Pathianni zan khan Liverpool hian an mikhual West Ham chu 4-1 ngawtin an sawp.

Liverpool tan Emre Can, Mohamed Salah, Roberto Firmino leh Sadio Mane ten goal khat ṭheuh an khung a, inkhelh zawhah Hammers boss David Moyes chuan, "Tun dinhmuna Liverpool player-te quality sang tak hi kan tan chelh rual a ni lo," tiin a sawi.

100 = not out
Anfield-a inkhelah Liverpool-in goal khung turin minute 29 bak hun an mamawh lo–Salah-a'n post a pet per hnuah Emre Can-a'n Liverpool tan goal hmahruai a tauh lut a, Reds-in tun season-a goal 100 an khung tlinna chiah a ni–heti zat goal khung tur hian match 40 bak an mamawh lo a, Premier League club zingah Manchester City chiah tun season-a goal 100 nei tawh an awm.

Chawlhlawk hman a nih hnuah player hmuhnawm Alex Oxlade-Chamberlain-a'n Salah tan a siamsak ve leh thung a, 'Egyptian King' tia hming lem an pek forward hian tun season-a a goal 31-na ni turin a khung. "Premier League nomawi chawi ngei ka duh a, Liverpool nen ngeia hlawhtlintir ka duh bawk a ni," titu forward hian tun season-a a league goal 23-na a ni a, assist vawi riat a nei tawh bawk.

Hammers goalkeeper Adrian tihsual nangchingtu Firmino-a'n Liverpool goal thumna a khung hnuah substitute Michail Antonio-a'n West Ham tan khung ve zawk mah se Reds an chi ai phah lo a, post a pet per hnuah vanduai nawn duh bik loin Mane-a'n Liverpool goal lina a khung.

Hei le Liverpool
October 2015-a Liverpool a enkawl hnuah Jurgen Klopp-a'n nomawi a la chawi lo–mah se German coach hian League Cup leh Europa League final Reds hi a lo khelhpui tawh a, tun season-ah Champions League khelin an ke lehlamin quarterfinal an rap tawhah ngaih a ni bawk.

October 22-a Liverpool-in 4-1 ngawta Tottenham Hotspur an ngam loh khan table-ah pakuana dinhmun an luah a, an chunga awm team zingah Burnley, Watford leh Newcastle United an tel a, Merseyside club dinhmun chhiat zia hai rual a ni lo.

Mahse, thla li a liam a, league match 10 chiah khelh tur awm tawhah 2013-14 season hnua league an khar ṭhat ber tawng thei dinhmunah Liverpool an awm mek–table-ah pahnihna an ni mek a, nizana Manchester United inkhel result a zirin a la danglam leh thei bawk. Hriat tel atana ṭha erawh March 10-ah United leh Reds an la intawng leh dawn.

Fimkhur a ṭul
Liverpool-in an khelmuala league match an khelh hnuhnung 16-ah tlawm hmel an hmu ta lo a, manager Jurgen Klopp erawh a la ṭawng fimkhur hle. Liverpool boss chuan, "Pahnihna nichungin season kan khar thei ang em ka hre lo. Kan hmachhawn leh tur hi Newcastle an ni a, Rafa Benitez hi khawvela manager ṭha ber zinga mi a ni," a ti.

Klopp-a'n a naute fak nan erawh ṭawngkam a ui lo. German coach chuan, "Tlarhnung kan veng ṭha a, tlarhmaah kan hlauhawm bawk. Counter attacking kan neih dan a ropui a, kan thawhrim dan a ropui a, kan rilru puthmang lah fak phu a ni.

"Hetiang ang game hmuhnawm hi kan duh ṭhin a, mah se hlawhchhuah erawh harsa tak a ni. Season chawhnu lam tawhah hetiang taka kan khel thei hi ka lawm a, tun hi chet ṭhat hun chu a ni," a ti.

Sorry Moyes
Liverpool inkhel hmuhnawm karah Hammers-in chance nei lo tawp an ni bik lo–goal luh hma Marko Arnautovic chance neih ṭha zet chu Loris Karius-a'n ṭha zetin a dan sak a, Austrian forward hian box pawn aṭangin hun duhawm a nei bawk. Mahse, Karius-a'n Liverpool keeper buaina a chingfel tawh dawn niin a lang.

Moyes atan Anfield lenluh hi thil nuam a ni lo–a vawi khat nana Manchester United defender hlui Patrice Evra khelhtirtu coach hian Anfield-ah hnehna a la chang ngai lo a, Liverpool khelmuala vawi 15 a lenluh tawhah a team chu vawi riat a tlawmpui.

Scottish manager chuan, "Match hautak zet a ni dawn tih kan hria a, first half-a kan khelh dan erawh lawmna tur niin ka hria. Anfield-ah chuan chance tam tak kan nei dawn lo tih hi kan hre sa a ni," tiin an chance neihchhun an chhawr lo chu a ui thu a sawi.

Inkhel Result
Leicester City 1–1 Stoke City
Bournemouth 2–2 Newcastle United
Brighton 4–1 Swansea City
Burnley 1–1 Southampton
Liverpool 4–1 West Ham
West Brom 1–2 Huddersfield Town
Watford 1–0 Everton