Vawiin tlaiah Minerva leh Aizawl FC
I League champion tum Minerva Punjab-in vawiin tlai dar 2:00 hian champion lai Aizawl FC chu an mual Tau Devi Lal Stadium-ah an mikhual dawn.
Beisei pha lo
Minerva hi match hnuhnung pangaah vawi khat chauh chakin vawi hnih an chak lo a, an khingpui tur Aizawl FC hi tun season-ah an hneh loh hmasak ber an nih bawk avangin Punjab club hi champion chianga dah a thiang tawh lo.
Mizo club erawhin I League match riat chhung chak hmel an hmuh loh hnuah coach thar Santosh Kashyap-a hnuaiah Indian Arrows 3-0 in an sawp a, an phur vanglai tak a ni.
Defensive game
India ram football hrechiang Santosh Kashyap-a'n defensive game khelh a hreh lo a, Mizo club hian Indian Arrows an hneh ṭumin an khingpui aiin ball possession an nei tlem a, ball an in pass tlem zawk bawk.
Amaherawhchu Aizawl FC hian tun season I League-a a vawi khat nan goal thum an khung tling a, point thum an hlawh chhuak.
Inkhelh banah Kashyap chuan, "Indian Arrows-in defensive game an khel lo a, keimahni zawkin kan khel," tiin a hlawhtlinpui ṭhin defensive game khelh a zahpui lo a, khualmuala Minerva Punjab an hmachhawn hunah pawh goal khung aiin goal venhim an ngai pawimawh hmasa ang.
Minerva hmachhawn tur zingah Masih Saighani a zin ve lo. Afghan defender hian Portuguese coach Paulo Meneses awm loh hnuah match khat chauh khelin match hnih dangah erawh 'food poisoning' vangin a inlan lo a, tun thlenga a la inlan loh avangin chhan dang a awm niin a lang tawh zawk.
Mabiaa telna
Minerva Punjab-in Mizo tlangval Vanlalbiaa Chhangte an lalut a, Hriangtlang tlangval hi an match hnuhnung bera Gokulam Kerala nen an inkhelh ṭumin minute 84-naah luhtir a ni a, inkhel result erawh a danglam phah lo.
Punjab club hian East Bengal an hneh tawh loh bawk avangin an mualah a zawnin vawi hnih an chak tawh lo a, hei hi Aizawl FC fuih phurtu tur a ni.
Minerva tan erawh chetsual a thiang tawh lo a, Mizo club laka phuba la chungin I League champion kawng zawh an tum dawn a ni.
Champion inumna
Minerva Punjab-in match hniha khel tlemin hmahruaitu Neroca point hnihin an pha lo a, East Bengal nen an point hmuh zat inang mah se head to head-ah an tluk loh avangin Punjab club hian champion an duh a nih chuan Kolkata club aiin point an hmuh tam a ṭul dawn a ni.
Minerva khelh hmabakah hian Mizo club bakah Chennai City leh Churchill Brothers te an awm a, champion rinkai an la ni pha reng. Hetihlai hian East Bengal chuan khualmualah Shillong Lajong an tlawh dawn a, match hnuhnung berah hmahruai mektu Neroca an mikhual dawn.
Champion thei tur chin a hriat takah chuan I League thuneituten fixture an thlak a, March 8, tlai dar 3:00-ah champion zawnna a awm dawn. East Bengal leh Neroca te inkhelh rualin Minerva leh Churchill an inkhel ang.