India aiawh tur Lalremsiami

Hockey India chuan March 3-12 chhung hian South Korea-ah tour a nei dawn a, India aiawh tur hian Mizo tleirawl Lalremsiami chu thlan a ni. India leh Korea te hi vawi nga an inkhel dawn a, a hmasa ber atan March 5 hian Jinchun National Athletic Centre, Jinchun-ah an intawng ang.

India nulate hi Women's Asia Cup 2017 an champion hnuah hma an sawn chho hle a, April-ah Commonwealth Games an khel dawn a, Korea tour an neih tur hi CWG atana inpuahchahna a ni.

Kolasib tleirawl Siami hian nikum November thla kha India chu Asian Cup a chawipui tawh a, Thenzawl Women Hockey Training Centre aṭanga zir chhuak hian Asian Cup an khelh ṭum hian inkhel zawng zawngah bul ṭanin a inlan kim vek a, Japan leh Singapore lakah goal a khung.