Futsal League final-ah goal a lut tam, a hmuhnawm Chanmari an champion

RFL Plastics MFA Futsal League-a champion hmasa ber chu Chanmari an ni a, nomawi chawi turin February 23 zan khan Chhinga Veng 6-5 in an hneh.

Final-a goal li khungtu Chanmari player David Laltlansanga chu best player atana thlan a ni a, champion team hian fairplay chawimawina an dawng bawk.

A goal tam
Team pahnih hi an intawn hmasak ṭumin Chanmari hi 5-4 in an chak a, team pahnihah player theihna sang an tam avangin final-ah pawh a goal tam dawn tih chu rinlawk dan a ni.

A hmawr bawk zanah Lalsawm­zela hmangin Chhinga Vengin hma an hruai nghal a, Lalbiaknia leh Avid-a te goal hmangin Chanmariin lehthal mah se Vanlalthanga hmang­in Chhinga Vengin an sut lehnghal.

Futsal leh football danglamna a lang a, Chanmariin 'time out' koin game plan an thlak a, first half-ah Avid-a'n goal hnih a khung belh a, minute 25 a zawh chuan 4-2 a ni.

Second half ṭan tirhah Chawn­pui tlangval Avid-a bawkin goal a khung a, Chanmariin 5-2 in hma hruai mah se, Chhinga Veng goal nawr a nat avangin chak tur a la chiang lo.

Chhinga Veng beiseina siam turin Vanlalhriata'n goal hnih a khung belh a, 5-4 a nih chhoh tak avang leh minute nga a la awm avangin Chanmari an hlauthawng.

Amaherawhchu, Chhinga Veng keeper-in ball hnek sualin beiseina siamtu Hriata a tihper hnuah an lamah a lut a, 6-4 a ni tawh nachungin huaisen takin an nawr chhunzawm a, VL Thanga'n penalty aṭangin goal khat dang khung belh mah se si phurh sutna tur hun a awm tawh lo a, 6-5 in inkhel a tawp.

Avid-a a vul
Chanmariin MFA Futsal League khelh hmain Dinthar Futsal Club aṭangin Avid-a hi an lei chhuak a, hming langsar pawh ni lo sum senga an la ngam hian mi nazawng hmuh loh an hmu tih a lang.

Avid-a hian an veng club Chawnpui FC chu MPL7 khel turin a hruai thleng tawh a, mi hriat a la ni lo. Futsal League-ah erawh thup theih ni tawh loin final thlen nan goal 14 a khung tawh a, Durtlang nen an inkhel ṭumin inhliam vangin a khel tluan lo.

Hemi ṭum hian Avid-a pa chuan, "A la naupang deuh a ni" tiin Vanglaini palai a hrilh a, amaherawhchu final-ah erawh entu mipui ṭhahnem takin a naupanna hmu loin a goal li khung lai an hmu thung.

Champion dan hria Chanmari
Chanmariin tun hmain tual­chhung basketball an thunun ṭhin a, cricket lama inelna ngaihhlut Mapuia Cricket League-ah pawh Chanmarians chu champion lai a ni.

Football-ah Chanmari FC an ropui a, amaherawhchu tun season-ah Chhinga Veng hnuaiah an kun a, futsal hmangin phuba an la.

Chanmari hian champion dan thuruk an hria a, an hriat chu player ṭha lakluh leh chu mite tiphur turin veng chhung mipuiin a ṭha thei ang bera ṭawiawm a ni. Final-ah hian Chanmariin ṭantu an nei ṭha a, pressure sang paltlang turin puitu an nei ṭha.

Chanmari coach Samuel Lal­rin­zuala Sailo chuan, "MFA Futsal League-a champion hmasa ber kan ni thei hi kan lawm hle a ni. Veng chhung mipui bakah NGO hrang hrang aṭangin ṭawiawmna kan nei ṭha a, team chhung boruak a ṭha bawk," tiin Vanglaini a hrilh.