Bayern Munich an chak zo lo

Inrinni zan Bundesliga inkhelah Bayern Munich chu an mikhual Hertha Berlin nen goal awm loin an inhnehtawk a, German champion hian a zawna match 15 chhung hnehna chan record siam an tumna chu a hlawhtling zo ta rih lo.

Jupp Heynckes-a naute hian Champions League-a Besiktas an hneh khan an club chak zawn rei record an nihrual tawh a, record siam tumin Allianz Arena-ah Hertha Berlin mikhual mah se an vanneih ṭum a ni tawh bik lo.

Bayern Munich hian 2015 May thla hnua a vawi khat nan an khelmuala league match an khelhah goal an khung lo a, heti chung hian an hnuai chiaha awm Borussia Dortmund aiin point 20 zetin an sang fal zawk tawh a ni.

German champion Bayern hian inkhel an thununin goal khung tum pawhin an pet hnem hle, mah se Hertha keeper Rune Jarstein a chesual duh lo. Jarstein hian striker Robert Lewandowski khung ngei tura ngaih vawi thum ngawt a dan sak a, forward Arjen Robben-a freekick chu ṭha zetin a dan sak bawk.

Bayern Munich manager Jupp Heynckes chuan, "Goal kan khung lo chung khan ka naute khan an khel ṭha ka ti hle, hun ṭha vawi tam tak kan insiam thei a, vanneih ṭum chu nise kan khung nual ang. Chutihrualin Hertha Berlin khan an tum an chiang, champion team hmachhawn tura an inpuahchahna zawng zawng kha a fakawm hle a ni." tiin an khingpui a fak.

Hertha coach Pal Dardai chuan, "Lewandowski-a'n an khelmualah a zawnin league match 12 chhung goal a khung tawh a, mahse keini chuan kan veng thei. Kan tlarhnung ten fak an phu a, counter attack aṭang khan kan hlauhawm ve hle bawk a ni," tiin tun season-a goal 29 khung tawh striker an ven theih thu a sawi.

Inkhel dangah pathumna Eintracht Frankfurt chu Stuttgart lakah 1-0 in an tlawm, goal awmchhun hi Erik Thommy khung a ni. Borussia Monchengladbach chuan 1-0 in Hannover an hneh a, Hoffenheim chu Freiburg nen 1-1 in an inhnehtawk thung.