Lianzuala lansarh zanah Delhi an chak

Inrinni zan Indian Super League inkhelah Lallianzuala Chhangte-in goal khung lo mah se Lunglei rawlthar a langsar a, Winning Pass of the Match leh Emerging Player of the Match chawimawina dawng chungin Delhi Dynamos hnehna a chanpui.

Delhi khawpuiah Dynamos-in ATK an mikhual a, goal sarih ngawt a lut–Tottenham Hotspur legend Robbie Keane-a'n ATK tan goal hnih khung mah se a tawk zo lo a, Delhi hian 4-3 in hnehna an chang.

ATK tan Keane bakah Sibongakonke Mbatha chuan Kolkata club tana a match hmasa berah goal a khung nghal a, Seityasen Singh, Matias Mirabaje leh Kalu Uche (goal hnih) ten Dynamos tan an khung ve bawk–Seityasen goal khung hi Lallianzuala siamsak a ni.

Zirtawpni zan South Indian derby-a Kerala Blasters leh Chennaiyin FC inkhelah goal lut loin an ṭin a, Kerala tan tlarhnunga ban rinawm Lalruatthara chu Emerging Player of the Match-ah thlan niin Hmunhmelṭha tlangvalin a khel ṭha hle.

Chennaiyin tan Jeje Lalpekhlua'n Rene Mihelic nen mawi zeta ball an inpek kual hnuah goal khungna remchang nei mah se Hnahthial tlangval hian goalkeeper chauh hmachhawn chungin a pet goal thei lo.

Chennai club goalkeeper Karanjit Singh chu Hero of the Match-ah thlan a ni a, hei hian chiang takin inkhel dinhmun a hrilhfiah–Blasters hun neih ṭhat vawi tam a hlawhchham tir a, Jerry Lalrinzuala'n box chhunga a foul avanga penalty a chawi Courage Pekuson-a'n a pet chu a dang bawk.

Mimal Lawmman
Kerala Blasters 0–0 Chennaiyin FC
Limitless Player Karanjit Singh, Chennaiyin FC
Winning Pass of the Match Rene Mihelic, Chennaiyin FC
Fittest Player Henrique Sereno, Chennaiyin FC
Emerging Player Laruatthara, Kerala Blasters
Hero of the Match Karanjit Singh, Chennaiyin FC
Delhi Dynamos 4–3 ATK
Limitless Player Robbie Keane, ATK
Winning Pass of the Match Lallianzuala Chhangte, Delhi Dynamos
Fittest Player Sibongakonke Mbatha, ATK
Emerging Player Lallianzuala Chhangte, Delhi Dynamos
Hero of the Match Kalu Uche, Delhi Dynamos