Real leh Barcelona-in goal khung an uar

Inrinni zan La Liga inkhelah Real Madrid leh Barcelona an inlan a, club lian pahnihin goal khung an uar hle–Real hian an mikhual Alaves 4-0 in an sawp a, Barcelona-in an hmahruaina belhchhah turin Girona chu 6-1 in an sawp.

Real Madrid tan Cristiano Ronaldo-a'n goal hnih a khung hnuah hattrick siamna remchang nei mah se tun hnaia goal khung a harsat avanga sawisel hlawh Karim Benzema a pet tir a, Portugal captain-in fak a hlawh phah hle.

Barcelona tan Luis Suarez-a'n hattrick a siam bakah Lionel Messi leh Philippe Coutinho ten goal an khung ve bawk a, Catalan club tan Suarez, Messi, Coutinho leh Ousmane Dembele ten inkhel bul an ṭan a, Barca tana a ruala an inlan vek hmasak ber a ni.

BBC is back
Hliam vangin Gareth Bale a talbuai reng a, Ronaldo leh Benzema ten beisei an phak lo bawk; hei hi Real-in La Liga leh Copa del Rey nomawi an beisei theih tawh loh chhanah ngaih a ni a, 'BBC' tih hminglem an pek tlarhma ten khawvela tlarhma hlauhawm ber pawla sawi an nih ṭhinna chhan khelmual chhungah an lantir thei lo.

Mahse, Bale-a'n dam lam a pan a, Ronaldo-a'n ngai a awh chhoh leh tak bawk avangin BBC-in ngai an awh

ṭan–minute 44-naah Ronaldo-a'n goal hmahruai a khung a, chawlhlawk hman a nih aṭanga second 28-na lekah Bale chuan an goal hnihna a khung ve bawk–2004 hnua Real-in chawlhlawka goal an khung ran ber niin tun season-a a goal 10-na a ni. Welsh forward hian bar a pet per bakah penalty a hlawh chhuak tel bawk.

Ronaldo-a'n Real tana match a khelh hnuhnung paliah goal riat a khung tawh a, tun season-ah goal 28 a khung leh der tawh–kum 33 mi forward hi a chuai ve thei dawn lo emaw tih mai tur a ni.

Fak hlawh Ronaldo
Real tana penalty pet ṭhintu chu Ronaldo a ni a, Portuguese forward a awm loh chuan captain Sergio Ramos-a'n a pet ṭhin. Mahse, minute 89-naa Bale-a'n penlaty a hlawhchhuahin Ronaldo lo pen chhuak tur Santiago Bernabeu-in a thlir a, Benzema a rawn pen chhuak thung.

Hattrick siam thei dinhmuna ding Ronaldo-a'n a ṭhianpain inrintawkna a neih leh theih nan Benzema a kian a, fak rawn a hlawh. Real coach Zinedine Zidane chuan, "Football chu team game a ni a, Ronaldo thutlukna khan minti lawm takzet a ni," a ti–Benzema hian penalty a khung bakah hian assist vawi hnih a nei.

Real goalkeeper Keylor Navas chuan, "Cristiano thutlukna khan min ṭhawng hran lo a, eng ang mi nge a nih hi chu ka hriatna a rei tawh," a ti a, Lucas Vazquez chuan, "Cristiano khan team spirit dik tak a pholang a, Karim khan goal khung kha a phu a ni," tiin a ṭhianpa a fak ve bawk.

Suarez = 3
Barcelona-in Girona lakah minute thumna leka Portu goal vangin hma takah goal chhuah mah se Luis Suarez chuan minute hnih hnuah an si phurh a sut nghal a, Catalan club an hawikir tawh lo. Suarez hnuah Messi a inlar chhunzawm ve lehnghal a, Argentine striker hian defender pathum buma an goal hnihna a khung hnuah freekick hmangin a chhuih lut leh bawk.

Minute 44-naah Suarez-a'n Philippe Coutinho hnen aṭanga a ball hmuh chu goal-ah a chantir a, Coutinho-a'n minute 66-naah La Liga-a a goal hmasa ber a khung ve leh bawk. Suarez-a'n hun tawp nan minute 14 chauh a awm tawh tihin hattrick a siam a, a goal thumna hi Dembele siamsak a ni thung.

Barcelona-in hnehna an chan avangin La Liga match 32 chhung chu tlawm hmel an hmu tawh lo tihna a ni a, club record a ni–tun season-ah league match 25 khel tawhin an la tlawm miah lo. La Liga match 13 chauh a awm tawh a, Barca hi an tlawm lo zel a nih chuan kum 1930-a league match 18 chiah khelh a ngaih lai hnua tlawm hmel hmu lo chunga La Liga champion hmasa ber an ni ang.

Valverde a hlim
Barcelona-in goal ruk an khung a, hei aia tam zawk pawh khung thei an ni–Suarez-a'n post a pet per a, Thomas Vermaelen tauh goal ngei tur nia lang chu Girona keeper Bono chuan crossbar a nam per bawk.

Catalan club coach Ernesto Valverde chuan, "Kan ṭhatna min belhchhah turin player kan lalut a, an hna an thawk ṭan der tawh a ni," tiin khel ṭha Coutinho leh Dembele a fak.

Valverde chuan, "Dembele hi a tirah a inhliam nghal avangin a tan a harsa em em a, kan team khelh dan phung a man chho ve zel a ni. Coutinho khan a khel ṭha em em bawk a, player pahnih hmasawnna kan hmu a ni," tiin a hlim hle.