Zarkawt BCA an chak vek

Mizoram Super League season linaah Zarkawt BCA chuan league round khar nan Mission Vengthlang Hollow chu 81-52 in an sawp a, match ngaah hnehna chang vekin pakhatna nichungin semifinal an lut.

February 23, Zirtawpni zan inkhel hian table-ah nghawng a nei tawh lo a, Hollow hi chak pawh ni se parukna an chhuahsan thei tawh lo a, an chak loh zui avangin match nga an khelhah an chak lo vek.

BCA an ṭha rual
Zarkawt BCA-in ṭan phat aṭangin inkhel an thunun a, team pahnih an inthlauh deuh avangin Hollow an che thei lo. First quarter-ah 27-12 in BCA-in hma an hruai nghal a, inkhel a hmuhnawm zui lo.

BCA tan Lalrina Renthlei (12 pts), Henry Lalramngaihawma (10), R. Lalfakawma (10) leh Lalsangkima (10) ten double digit an lut vek a, player 12 zinga 10-in point an nei vek a, an khel ṭha rual hle.

Mission Vengthlang tan Ronald Zomuanpuia bawk che ṭhain point 13 a nei a, amaherawhchu ṭum dang ngaihtuah chuan a khel ṭha lo. Hollow-in chak an la nei lo a, league match hnuhnung berah team ṭha ber an tum zui avangin result ṭha an hlawh chhuak lo.

Hmabak chu
Zarkawt BCA hian khingpuite hneh vekin semifinal lut mah se final khel tur zawnnaah Khatla TBL an hmachhawn dawn a, he club hi tun hma aṭangin an ngam theih loh a ni.

Khatla TBL hi semifinal aṭangin coach leh player ni kawp H. Laldinsanga'n a ho theih tawh a rinawm avangin Zarkawt club tan hriat nuam a ni dawn lo a, BCA tan fiahna hau tak a ni ang.

Mission Vengthlang Hollow-in league round-ah chak nei lo mah se MSL khel zel turin beseina an la nei a, an tumpui tawk ber tura ngaih Republic VR4 an hmachhawn dawn. Relegation playoff-a chak zawk hian MSL an khel nghal dawn lo a, MSL qualifier-a pahnihna nen playoff an la khel leh dawn a ni.