Zaninah Paris Saint-Germain inlan dawn : Lionel Messi a inkhelh a rinawm
Paris Saint-Germain chuan zanin dar 12:30 hian Ligue 1 match khel turin Stade Francis-Le Ble-ah Brest an lenchilh dawn a, player thar Lionel Messi-a'n team training pangngai a zawm tawh avangin Paris club tana a match hmasa ber a khelh a rinawm.
Barcelona fa chuam, club dang tana khel ngai loa tura ngaih kha a chhuah miau avangin football khawvel a sawinghing a, a club thar tana a khelh hun hi PSG ṭantute chauh ni loin football ngainatuten an nghakhlel takzet.
Mauricio Pochettino naute hian an league match hmasa pahnihah hnehna an chang, goal khung an harsat loh avangin Messi tel lo pawhin Brest hi an hneh theih a rinawm, chutih rualin Argentina captain chhawr hi an chak ve bawk ang tih a chiang.
An khek phawt
Kar hmasa aṭang khan Messi-a'n PSG training a zawm tawh, an league match hnuhnung ber an khelh ṭumin inkhelh hmain Messi bakah tun nipui bazar chhunga an lakluh Sergio Ramos, Gianluigi Donnarumma, Georginio Wijnaldum leh Achraf Hakimi te an pho chhuak.
PSG manager Pochettino chuan, "Inkhel tura a inpeih hunah a inlan ang," tiin Messi chungchang a lo sawi tawh, a player thar chhawr turin a hmanhmawh lo tih a hriat, kar khat chuang a training tawh avangin a inpeih ngei a rinawm.
Argentina manager hian training-na hmunah Messi hi Neymar, Kylian Mbappe, Angel di Maria leh Julian Draxler te nen a inkawptir a, a takah pawh anni ho hi a chhawr rual a nih pawhin a mak hran lo ang - chak la nei lo Brest tan hmachhawn châkawm lo tak tur an ni ang.
Messi khel tase
Barcelona tana an khelh laiin Messi leh Neymar te hi an inkawp rem tih a chiang tawh, tlarhma lamah chuan mual sir lama khel thiam ve ve an ni. Anni pahnih hi a sirah an awm a nih chuan a laiah tlan chak Mbappe a awm thung ang.
Anni pathum hnungah hian tawnhriat nei ṭha Wijnaldum a awm ang. Liverpool midfielder hlui hi league match hnih an khelh tawh chinah a la inlan ve ve a, season kal zel turah pawh hmuh pawimawh a chan chhunzawm zel a rinawm.
Copa America khel Di Maria leh Euro 2020 champion Marco Verratti te pawh chhawr theih an ni tawh dawn, chutih rualin Poch tan player lo kir hlim match khata chhawr tam lutuk kha tihsual theih a ni - Spanish midfielder Ander Herrera a luh a la rinawm ber.
Tlarhnung lam
A vanglai chuan Sergio Ramos hi khawvela defender ṭha berte zinga mi a ni, a vanglai erawh a pel deuh tawh. Spanish defender hi Champions League beisei vanga lakluh a ni a, hliam vangin September thla hma chuan a inkhel thei dawn lo.
Ramos a la inpeih loh avangin Presnel Kimpembe chu chuh buaitu awm loin tlarhnung laiah a khel leh ang. France internaional hi match hnih an khelh tawh chinah Thilo Kehrer nen an inkawp, tawnhriat nei ṭha Marquinhos a inpeih leh tawh avangin kum 24 mi Kehrer tan khelh phak a harsa dawn.
Poch-a'n player a thlan dan tur a la hriat vek lo, nakinah chuan Kimpembe leh Ramos te an la inkawp rem mai thei, chutiang a nih chuan Brazilian player ṭha Marquinhos hi defensive midfielder atana chhawr theih a ni ang.
Goal veng tur
Real Madrid tana a khelh laiin Keylor Navas chu a elpui tur man tam takin Thibaut Courtois lei a ni. Costa Rica international goalkeeper Navas hian thapui thawhin hmun nghet chan a tum a, a tir lamah khel phak mah se Courtois-a'n a nek chhuak.
Spanish club lian aṭangin PSG a zawm, Paris club tan khel ṭha viau mah se a elpui tur bawkin Gianluigi Donnarumma an lalut leh. Italy internaional Donnarumma hi match hmasa pahnihah chuan a la khel lo, training a neih tlem vangah a ngaih theih.
Kum 22 mi Donnarumma hi Euro 2020 best player ni thei a ni a, theihna nei sang leh tun dinhmunah khawvela ṭha ber ang hiala sawi ngam a nih avangin Navas tan elpui hautak bik a ni dawn. A lan dan chuan Donnarumma-a'n Navas hi a nek chhuah leh a rinawm.