Mohun Bagan-in Bengaluru hnehin bul an ṭan

Asian khawmualpuia club football inelna sang ber dawttu AFC Cup-ah Indian derby kan hmu a, ATK Mohun Bagan chuan anni aia record nei ṭha zawk Bengaluru FC chu 2-0 in an hneh.

Bagan tan an striker hlawh hnem Roy Krishna leh Subhasish Bose ten goal khat ve ve an khung a, Bangalore club lamin a chhanletna tur an nei lo.

Kolkata club tan Mumbai City aṭanga vaibelchhe hnih senga an lei Hugo Boumous chuan a man to chhan pholangin a khel ṭha takzet a, Bengaluru tan buaina thlentu a ni.

Krishna goal khung pawh hi Boumous thawhchhuah a ni a, a corner pet aṭanga ball kal chu Bose-a'n goal zawnah a tauh a, hei hi Krishna chuan lo tauh ve lehin Gurpreet Singh Sandhu tan tih theih a awm lo.

Bagan goal hnihna luhna kawngah pawh Boumous a thawhhlawk a, David Williams hnena a ball pek chu Australian striker hian Bose tan a pe a, a kum 26 tlin lawm nan Bose hian a khung zui.

ATK Mohun Bagan coach Antonio Lopez Habas chuan, "Ka player-ten game ṭha tak an khel a, an result-ah ka lawm hle a ni," tiin a sawi.

Bagan leh Bengaluru hi group D-ah Bangaldesh club Bashundhara Kings leh Maldives club Maziya S&RC te nen an awmho a, an group aṭang hian point hmu sang ber chauhin knockout round an lut dawn - Bengaluru tan insiamṭhat a pawimawh.

Group D inkhel dangah Bashundhara Kings hian 2-0 vekin Maziya S&RC hi an hneh ve bawk a, Mohamed Irufaan (own goal) leh Robinho ten goal khat an khung chu Bangladesh club hian an chakpui - kum 26 mi Robinho hian Brazilian club ṭha Fluminense aṭangin Bashundhara hi loan-in a zawm a, Bangladesh club hi an ṭha hle.

AFC Cup hi knockout tournament dang anga kalpui a ni lo a, zone angin kalphung duan a ni a, group D-a point hmu sang ber hi Inter-zone playoff semi-final an lut dawn - an chak chuan Inter-zone playoff final an khel leh ang a, heta chak hian final an lut ang.

AFC Cup-ah hian Bengaluru hi Indian club zinga record nei ṭha ber an ni a, kum 2016 khan final an lut a, kum 2017 khan Inter-zone playoff final (semifinal tlukpui) an lut bawk.

Dempo (2008) leh East Bengal (2013) te chuan semifinal an lo lut ve tawh bawk a, Mohun Bagan-in an thlen san berah kum 2016 khan round of 16 an lo lut ve tawh thung.