Thiem tan season a tawp ta

Dominic Thiem chuan tun season chhungin a inkhelh ve theih tawh loh tur thu a sawi. Austrian star hi banrek hliam vangin a chawl mek a, nomawi a kawlna US Open-ah pawh a title humhim turin a inlan ve thei dawn lo tihna a ni.

June thla khan Mallorca Open-ah Thiem hi a inlan, inelna a hmachhawn laiin Thiem hi a inhliam. Wimbledon aṭangin a inhnukdawk a, inelna ngaihhlut Tokyo 2020-ah pawh ram aiawh in a inlan ve thei lo. Inkhel leh tur chuan season thar a nghah a ngai tawh dawn.

Kum 27 mi Thiem chuan, "Ka hliam pawh zawimuangin a dam chho ve zel, mahse kar hmasa khan training-na hmunah ball ka vua a, ka banrek a la na tlat. Damdawi lam thiam ten inkhel rih lo tura thurawm min pek chu ka zawm a ngai.

"Banrek hliam hian ngaiawh leh tur chuan hun a duh rei, nakin zelah ṭha zawka hun rei tak ka inkhelh theih nan tunah hian 100% a ka dam hma chuan inkhelh luih loh hi a fuh zawk ang," tiin a sawi a, thutlukna siam harsa tak a nih thu a sawi bawk.

Season hmasa khan Thiem hi a khel ṭha hle. Australian Open final a thleng a, hard court inelna lian dang US Open-ah a champion bawk. New York khawpuia inelna neihah hian Alexander Zverev laka set hnih a hloh hnuah ropui takin a tho chhuak a ni.

Tennis season khat chhunga Grand Slam hnuhnung ber US Open-ah hian Roger Federer pawh khup hliam vangin a inlan thei dawn lo. World number 1 Novak Djokovic leh Rafael Nadal te erawh inlan ngei tura beisei an ni thung.