Man United-in Tchouameni leh Tolisso an dawr lo

Manchester United-in nipui bazarah midfielder an la zawng nia sawi a awm a, amaherawhchu tun thleng chuan Aurelien Tchouameni leh Corentin Tolisso te chungchangah Bayern Munich leh Monaco te an dawr lo.

Kum 21 mi Tchouameni hi season liam ta khan Ligue 1 Young Player of the Year-ah thlan a ni a, Team of the Year-ah thlan a ni bawk.

Bordeaux aṭanga inzir chhuak Tchouaméni hi France senior team tan la inlan lo mah se youth team hrang hrang U16 aṭanga U21 thlengin a inlan vek tawh a, theihna a neih san avangin club lian zawk nena sawizawm hi a mak lo.

Kum 27 mi Tolisso erawhin tawnhriat a ngah a, Bayern Munich tana nomawi chawi theih ang chu a chawi vek tawh. French midfielder hi Julian Nagelsmann hnuaiah hmun pawimawh a chang pha lo a, khelhna hmun tam zawk a chan theihna turah chhuak thei dinhmunah a ding.