Arsenal-in ṭan an la, an inren lo

Premier League club Arsenal-in Martin Odegaard leh Aaron Ramsdale te an lakluh fel chuan tun nipui transfer-ah pound maktaduai 100 chuang an hmang dawn tihna a ni a, player lei nana sum hmang tam zingah an tel ang.

Gunners hian left back Nuno Tavares (£7.2m), midfielder Albert Sambi Lokonga (£15.75m) leh Ben White (£50m) te a lalut fel tawh, player pathum man belhkhawm hi pound maktaduai 73 vel a ni.

London club hian Real Madrid aṭanga Odegaard an lakluhna tur hi pound maktaduai 30 bawr vel a ni a, Ramsdale pawh pound maktduai 24 a ni pha dawn. Gunners-in player lei nana an sum hman chu pound maktaduai 127 a ni pha daih dawn tihna a ni.

Norway captain
Martin Odegaard hi kum 22 mi a ni a, talent nei ṭha bik a ni. Real Madrid nen kum 2015-a contract an ziah khan kum 16 mi chauh a ni a, Spanish club hian Odegaard manah hian euro maktaduai 3 vel an seng daih.

Odegaard hian kum 15 leh ni 253 mi a nihin ram tan a khel thei a, tunah chuan Norway captain a ni tawh. Season liam ta khan loan hmangin Arsenal hi a zawm tawh a, season chanve chhung khelin league match 14-ah goal khat a khung.

Mikel Arteta-a'n Los Blancos aṭanga Odegaard lakluh hi a duh ber a ni a, Leicester City midfielder James Maddison hming a rik rin viau lai pawhin Gunners hian Odegaard hi an beisei tlat a, a tawpah an hlawhtling.

Norway captain hi midfield-ah Emile Smith Rowe nen an inthlawp dawn a, an hmuhnawm dawn tih a chiang reng. Odegaard hian ball a thiam a, a ke a rang a, ball pass a thiam bakah hmun chep aṭanga ball lakchhuah a thiam bawk.

Arsenal-ah hian Norwegian midfielder hi kum li daih contract ziak tura tih a ni a, kum khat pawhsei theih dan awm turah an ngai. He thuziah lai thleng hian an la tlangzarh lo.

Keeper manto
Arsenal-in Berd Leno elpui turin Sheffield United aṭangin Aaron Ramsdale an lalut dawn a, English keeper hi Blades match hnuhnung berah pawh squad-ah dah a ni tawh lo. Kum 23 mi Ramsdale manah hian Gunners-in pound maktaduai 24 an pe phawt ang a, a chet ṭhat dan a zirin pound maktaduai ruk an pek belh leh ang.

Ramsdale hi Sheffield United aṭanga inzir chhuak a ni a, Bournemouth-in kum 2007-a an lakluh khan pound maktaduai 8 vel an seng. Cherries an relegate khan Ramsdale hian a club hlui Sheffield United-ah a let a, a man hi pound maktaduai 18.5 zet a tling.

Tuna Gunners-in an leichhuah lehna tur nen phei chuan a man leina belhkhawm hi pound maktaduai 50 a tling tawh a, keeper manto tak a ni pha hrim hrim. Arsenal-ah hian kum li daih contract a ziak ang a, kum khat pawhsei theih dan a awm ang.

Mahse maw...
Arsenal hian pound maktaduai 100 chuang an hmang tawh chungin an player thar zinga bul ṭan pha nghal tura ngaih chu White leh Odegaard te chauh an ni a, player dang Lokonga, Tavares leh Ramsdale te hi chu squad tihchakna tur zawkah a ngaih theih.

Season ṭan hmain Gunners midfielder Thomas Partey a inhliam a, Brentford an hneh loh ṭumin kum 21 mi Lokonga-a'n bul a ṭan a, a khel chhe lo. Amaherawhchu Gunners hian kai thar Brentford hi 2-0 a an hneh loh avangin Arteta leh a hote sawisel a tawk nasa hle.

Arsenal harsatna belhchhah turin tun Pathianni hian Chelsea an hmachhawn dawn a, League Cup second round-ah West Brom nen an inkhel lehnghal ang a, champion lai Manchester City an hmachhawn dawn. Pep Guardola hoten League Cup second round an khelh ve dawn loh avangin Gunners aiin hahdamna hun an ngah ang.

Mikael Arteta hote hi league match thum an khelh zawhah point hmu lo thei dinhmunah an ding a, hei hi a thleng a nih ngat chuan manager chauh ni loin an club bakah player thar thlengin pressure nasa zawk an nei ang.

Engtin zel?
Nipui transfer hmang ṭha tiha an sawi PSG-in Lionel Messi, Sergio Ramos, Gianluigi Donnarumma Georginio Wijnaldum leh Achraf Hakimi te lakluh nan pound maktaduai 51.3 (€60m) chauh a hmang. Hakimi tih loh zawng hi free transfer-in an lalut.

Manchester United-in Jadon Sancho, Raphael Varane leh Tom Heaton te an lalut a, an man belhkhawm hi pound maktaduai 107 a ni. Arsenal ṭantute aiin Man United ṭantute an player lak danah an lawm zawk.

Arsenal-in pound maktaduai 100 chuang an hmang chungin an player lakten hriat an hlawh lo a; Chelsea leh Manchester City te player lak Romelu Lukaku leh Jack Grealish te erawh an langsar hle.

Chutihrualin Arsenal hian tun season thlir loin hma thlir thui zawk an nei a ni thei a, an tifuh phian thei bawk. Amaherawhchu Gunners-in league nomawi an chawi hnuhnun ber chu kum 2004 daih tawh kha a ni a, Arteta pawh hi a hma thlir a tih hlawhtlin hmain an ban mai hi a rinawm zawk hial a ni.