Croatia club-ah Jhingan a chiang ta

Indian defender lar Sandesh Jhingan chuan Croatian top division club HNK Sibenik a zawm chiang ta a, Nilaini zan khan Croatian club hian India international an lakluh thu hi an puang a ni.

Kum 28 mi centre back hian Thawhlehni khan Sibenik-ah hian medical a nei a, a paltlang hnuah Croatian club hian season khat chhung atan contract an ziahpui - kum khat dang pawhsei leh theih tura tih a ni.

Jhingan hian Pathianni khan Croatia hi a thleng a, Sibenik-in 6-2 ngawta Hrvatski Dragovoljac an sawp lai chu a hmunah a en nghe nghe - club training pawh a zawm tawh a, mahse, work permit leh thil dang tihfel ngai a la awm avangin kar khat vel chu inkhel turin a nghah leh phawt a la ngai dawn a ni.

Sibenik hian August 22 zanah Rijeka an lenchilh dawn a, Jhingan a la inlan thei dawn lo tihna a ni - August 28 zanah Istra 1961 an mikhual hunah erawh inlan thei tawh tura beisei a ni thung.

AIFF Player of the Year ni lai Jhingan chuan, "Ka phak china a sang berah ka theihna en ka duh a, ka tan chuan Sibenik zawm hi thutlukna dik niin ka hria. Ka lo sawi fo tawh angin Europe-a inkhelh hi ka châk ṭhin a, he chona hi lawm takin ka hmachhawn dawn a ni," a ti.

Sibenik coach Mario Rosas chuan, "Jhingan hi Indian footballer-te tana entawn tur hnutchhiahtu a nih zel ka beisei. A nuam tihna ber tlansanin a tum ruhna leh hmathlir chu a pholang a ni," a ti a, Jhingan-a'n huaisen taka thutlukna a siam thu a sawi.

Indian defender ṭha mi Sandesh Jhingan hian European football khelh duhin kum hnih chhung chu a lo thlithlai tawh a, mahse, hliamin a tlak buak vang leh Covid-19 avangin a beiseina hi a hlawhtling thei lawk lo.

ISL-a Indian player hlawh hnem ber pawl hian ATK Mohun Bagan-ah kum li dang cham turin contract a la nei a, mahse, September 2020-a Bagan a zawm pawh khan kum nga chhung atan contract ziak mah se European club-in an duh a nih chuan Kolkata club hian a kawng an dal loh tur thu an ziak tel a, an inrem sa thlap avangin Kolkata club hian a kawng an dal thei lo a ni.

Jhingan hian Croatia, Austria leh Greece aṭanga sawmna hnarin Sibenik hi a zawm a, he club hi season hmasa khan club 10 inelna Croatian First Football League-ah parukna an ni a, team 10 hi season tluanin vawi li an inkhel kual a, season khatah league match 36 an khel ṭhin.