Andy Murray a chak lo

Cincinnati Masters khelh laiah Andy Murray zin kawng a tawp. Britain star hi Nilaini zan khan Hubert Hurkacz lakah a tlawm a, second round paltlang zo lo in a tla. Daniil Medvedev leh Andrey Rublev te erawh an chak thung.

Vawi hnih a champion tawhna hmunah Murray hi wildcard pek a ni a, a match hmasa berah chakin bul pawh a ṭan fuh hle. Mahse, match hnihnaah erawh 7-6 (7-4), 6-3 in a chak lo, inkhel hautak hmachhawn tur chu a la ṭha tawk lo.

Kum 34 mi Murray chuan, "Chak lo mah ila lawmna tur ka nei. Grass court season leh a bik takin Wimbledon aiin ka khel ṭha zawk, match khelh tluan theih hrim hrim pawh hi ka tan chuan chanchin lawmawm a ni," tiin a sawi.

Murray hnehtu Hurkacz hian last 16-ah chuan Pablo Carreno Busta a hmachhawn leh dawn, tun inelnaah hian a champion thei a nih chuan tennis a khelh hun chhunga a nomawi palina tur a ni ang.

Inkhel dangah Medvedev chuan Mackenzie McDonald chu 6-2, 6-2 in a hneh, seeded pakhatna hian world number 3 pawh lo ni tawh Grigor Dimitrov a hmachhawn leh dawn, hard court-a inkhelh thiam pahnih an nih avangin a hmuhnawm dawn.

Medvedev ang bawka Russian player Andrey Rublev pawh a chak. Kum 23 mi Rublev hian 2014 US Open champion Marin Cilic lakah set hmasa ber chu 7-5 in hloh mah se, set hnuhnung pahnih chu 6-3, 6-1 a la letin hnehna a chang.

Champion tura rinkai zinga mi Alexander Zverev pawh a chak. Seeded pathumna hian Tokyo 2020 hnua inelna a hmachhawn leh hmasa berah hian Lloyd Harris chu 7-6 (7-3), 6-2 in a hneh a, Argentine player Guido Pella nen an inkhel leh ang.