Lewy-a'n chona thar hmachhawn a duh

German Supercup-ah Robert Lewandowski-a'n Bayern Munich hnehna a chanpui zo chauh a, khawthlang media-te chuan Polish striker hian chona thar hmachhawn turin Bavarians chhuahsan a duh niin an sawi.

Kum 32 mi Lewy hian Bayern tan inelna hrang hrangah match 331 a khel tawh a, goal 297 a khung tawh. Polish striker hian Bavarians hi nomawi lak theih ang chu a lakpui vek a, tun dinhmuna khawvela striker ṭha bera chhal ngam a ni.

Lewandowski hian tun Inrinni hian kum 33 a tling dawn a, Bayern-ah hlim mah se kum 35 a nih hmain chona thar hmachhawn turin European club ṭhaa insawn a duh niin an sawi.

Bayern striker hian kum 2023 thleng Allianz Arena-ah contract a nei a, contract a hman zawh chuan kum 35 mi a ni tawh ang. Bavarians hian player theihna nei sang bik Lewy hi chhuahtir tumna an nei lo a, chutihrualin a contract neih lai pawtsei turin tun hnaiah contract thar an zawrh lo.

Lewy hian a contract a hman zawh meuh chuan a kum vangin club lian zawm a harsat tawh dawn. Polish striker hi pa invawng ṭha tak a ni a, Manchester City boss Pep Guardiola pawhin, "Player ka hmuh tawhah chuan professional ber zinga mi a ni," tiin a sawi tawh.

Best FIFA Men's Player leh European Golden Shoe dawng tawhtu Lewy hian chhuah duh vangin Bavarians nen an boruak tihchhiat a duh dawn lo a, chutihrualin German club hian an player pawimawh hi hralh an phal loh bawk avangin tun nipuiah chuan a chhuak kher lo ang.

Bayern Munich hian August 22, Pathianni zan dar 9:00 hian FC Cologne an hmachhawn dawn a, Bundesliga champion lai hi league match hmasa berah Borussia Monchengladbach nen 1-1 in an inhnehtawk avangin chak ngei an tum tawh ang.