Benfica tan Champions League beiseina a sang

European football-a club mikhual lo tak Benfica leh PSV Eindhoven chu Nilaini zan khan Champions League playoff-ah an intawng a, Benfica-in 2-1 in hnehna an chang.

Benfica khelmuala inkhelah mualneitu team tan Rafa Silva leh Julian Weigl ten goal khat ve ve an khung a, PSV tana Cody Gakpo goal khung chu second leg atana beiseina siamsaktu a ni.

Nilaini zan inkhel dangah BSC Young Boys chuan season hmasaa Champions League khel Ferencvaros chu 3-2 in an hneh a, second leg an hmuhnawm lehzual dawn tih a chiang.

Champions League qualifying third round aṭanga Rangers pet chhuaktu Malmo chuan 2-0 in Ludogorets Razgrad an hneh bawk a, Champions League group stage an mitthla tawh a nih pawhin dem theih an ni lo.

Hei le Benfica
Benfica-in season hmasa khan Champions League an inpetkai zo lo a, tun season-ah season hmasaa an bul ṭanna third qualifying round aṭang bawkin bul an ṭan nawn - kuminah erawh thawnthu a danglam a, playoff an inpetkai.

Mahse, Portuguese club ṭha hi an vanduai bik emaw tih mai turin club ṭha PSV nen an intawng a, an talbuai phah lo thung - minute 10-na lekah Rafa Silva chuan hmahruaina goal a khung a, he goal luh theihna tura Ukrainian striker Roman Yaremchuk ball pass fing tak chu fak tlak a ni.

Benfica-in an duhtawk mai lo - chawlhlawk hman nan minute thum chauh a awm tawh tihah Julian Weigl a inlar ve leh a, Bundesliga lama player beiseiawm ni ṭhin defensive midfielder hian an goal hnihna a khung.

Hetihrual hian goal khung ringawt hi inkhel hrilhfiah nan a tling tawk lo a, Benfica goalkeeper Odisseas Vlachodimos a che ṭha takzet - group stage an inpetkai a nih ngat chuan Portuguese club tan ani hi fak tur chu a ni ang.

PSV beiseina
Dutch club-in kut ruaka haw tawp an duh bik lo - minute 51-naah Cody Gakpo chuan si phurh a rawn sut ṭhen a, Greek keeper ṭha Vlachodimos chet ṭhat zan ni lo se chuan PSV hi draw result nen tala haw phu an ni.

Hetihrual hian goal khungtu Gakpo lam hmaih a thiang lo. Kum 22 mi forward hi European player beiseiawm pawlah ngaih a ni a, club lian zawkah kan la hmu a nih pawhin a mak lo ang.

Netherlands tana vawi khat inlan ve tawh winger hian tun season-a match ruk a khelh aṭangin goal khat a khungna a ni a, assist vawi khat a nei tawh - season hmasa khan inelna hrang hrangah match 29 khelin goal 11 a khung a, assist vawi thum a nei bawk.

Team pahnih hi kum 1988 khan European Cup final-ah an lo intawng tawh a, PSV-in European club football inelna sang bera an nomawi hmasa ber chawi turin Benfica hi penalty hmangin an hneh - second leg-ah thawnthu hlui herlum theih an beisei ang.

Inkhel dang
Champions League playoff inkhel dangah Young Boys-in 3-2 in

Ferencvaros an hneh a, inkhel hmuhnawm bik a ni - Ferencvaros in Franck Boli hmangin goal hmahruai an khung a, Young Boys hian Meschack Elia, Vincent Sierro leh Ulisses Garcia hmanga chhangletin awlsam takin an chak dawn niin a lang hman.

Mahse, beisei ang ngawtin thil a kal lo - hun tawp nan minute riat chiah a awm tawh tihah Boli chuan goal mawi a rawn khung leh a, khualmualah tlawm mah se 3-2 a inkhel a tawp avangin second leg atan beiseina an nei ang.

Hetihrual hian Young Boys-in fak an phu hle. Defender Silvan Hefti chu Endre Botka a tih tluk avangin minute 25-na lekah hnawhchhuah a ni a, penalty a chawi bawk. Swiss club hian hun tam zawk player tlem zawk ni chungin an khel tihna a ni a, an vanneihna belhchhah turin Ferencvaros tan Myrto Uzuni chuan penalty hi goal-ah a chantir thei lo!

Hetihlai hian Malmo chuan Champions League group stage khelh ngei tumin Ludogorets chu 2-0 in an hneh ve bawk a, mualneitu team tan hian Serbian midfielder Veljko Birmancevic leh Norwegian striker Jo Inge Berget te chuan goal khat ve ve an khung.