Japanese GP an tlan dawn lo

Hripui leng vangin infiamna khawvelin ngai a la awh leh thei lo. October 10 a tlan tur Japanese Grand Prix chu tlan theih a ni dawn lo. Formula 1 thuneitu lam chuan inelna an ṭhulh thu hi an puang chiang tawh.

Formula 1 chuan thu chhuah siamin,"Japanese sorkar nen ngun takin kan inbiak hnuah inelna a awm thei dawn lo. Season hmasa ang bawkin hri leng vangin kan buai leh a, calendar siamsa pawh tih danglam ngai a awm leh dawn, a rang thei anga puanzar a ni ang," an ti.

Car intlansiakna sang ber hi tun season-ah intlansiak vawi 23 awm tura tih a ni. Mahse, Japanese GP hma hian Australia, China, Canada leh Singapore GP te chu tlan theih a nih dawn loh thu a lo chiang tawh bawk.

Japan hian nikum pawh khan coronavirus vang hian F1 hi a thleng thei lo, kuminah season kharna atan tal beisei mah se a rem chiah lo. Season khar nan chuan December thlatir hian Saudi Arabia Grand Prix leh Abu Dhabi GP an tlan ang.

Season kal laiah inelna a sang chho hle, champion lai Lewis Hamilton-a'n point 195 hmuin hma a la hruai mek, amah hnaih bertu Max Verstappen chuan point 187 a hmu ve bawk, champion tur zawk hriat thiam a har.