A vawi khat nan Derby an chak

Wayne Rooney kaihhruai Derby County chuan tun season Championship-ah a vawi khat nan hnehna an chang a, Nilaini zan khan Hull City 1-0 a hnehin goal awmchhun hi Sam Baldock-a'n minute 57-naah a khung.

Derby hian league match hmasa berah Huddersfield lakah point khat an hlawh chhuak a, 1-1 in an inhnehtawk. Match hnihnaah Sir Alex Ferguson-a fapa Darren Ferguson-a kaihhruai Peterborough an hmachhawn a, minute 90-na thlengin 1-0 in hma la hruai mah se Peterborough hian injury time minute khatna leh minute 10-naah goal khungin 1-2 in Rooney hote an vanduai.

Rooney hian Man United academy chhuak Ravel Morrison chu bul ṭan ṭhat lehna hun a pe a, Sir Alex-a'n theihna nei sang bik tiha sawi Morrison hi kum 28 mi chauh a la nichungin club khelhna a ngah tawh hle.

Season ṭan hma khan Derby-a hian Morrison-a'n trial a nei a, kum khat daih contract an ziahsak. Hull City lakah hian Morrison hian Derby tana goal khung theihna hun ṭha a nei a, keeper Matt Ingram-a'n a dansak.